O diáspora. Porque dalgo de desolación bíblica tien el tiempu presente n’Asturies. Porque nun dexen de ser bíblicos los llamaos a la esperanza, a la confianza “nel futuru”, los llamaos a una sociedá “dinámica, moderna, universal, abierta al mundu”. Llamaos que son la retórica, la gastada música cola qu’unes clases dirixentes ensín fuelgu nin intelixencia, tenten d’esconxurar la realidá real. Una sociedá qu’alegre y feliz adopta estándares culturales que cree vinientes del centru del mundu: esto ye de Madrid o New York. Anque en realidá vengan de McDonald’s o Hipercor. Y anque en realidá nun seyan más que vezos de consumu, obedientes rituales que finen delantre d’una caxa rexistradora: un monólogu individual colos obxetos y servicios que xeneren necesidaes non sentíes. Y bíblica ye --como un evanxeliu apócrifu--, la crisis positiva, la crisis estructural, la crisis de crecimientu. La Crisis: quiciabes la pallabra más escrita nos postreros trenta años n’Asturies. La crisis, como si fora un xuegu cruel y fatal del destín, y non un momentu hestóricu que da cuenta de dinámiques socieles y de procesos de toma de decisiones. Y asina, al empar que testeronamente los indicadores que miden el pulsu d’una sociedá, espeyen la llamuerga na qu’Asturies espatexa y se somorgia, como toa rempuesta y alternativa tenemos una alloriada actividá constructora de carreteres, pontes, puertos, pistes, caminos, siendes y fasta caleyes pelos cuatru requexos del país. Víes de comunicación --munches d’ente elles van de nengún sitiu a nenguna parte—qu’a la fín sí algamanon una función: facilitar l’exodu, enveredar la diáspora. Como si d’un cuentu cruel se tratare, los mesmos que coles sos decisiones politiques y económiques fexenon del futuru un mal suañu, enllenen Asturies de caminos pa la emigración. Pa que mes a mes, añu a añu, los más mozos baxen de los “montes firmísimos” dica la tierra plana. Dexen facienda y llar y pongan casa y esperanza baxo los cielos altísimos d’España. O d’aú seya. Trátase d’un procesu que ta mudando la estructura social y demográfica del país énte la indiferencia o’l silenciu compliz de les élites dirixentes. Pero’l mayor problema, lo qu’anubre’l presente, ye esa canalla que se queda, los que nun emigren, los culpables que coles sos decisiones maten la esperanza, emporquen el futuru.