Vien ser el ritu una costume, un cerimonial instauráu por un individu o un grupu social y constituyíu por un conxuntu d’actividaes que guarden ente sigo una determinada rellación. Estos ritos son imprescindibles pa l’articulación de cualisquier reagrupamientu humanu y pal afitamientu d’espacios comunitarios onde seya posible la identificación colectiva. Amás son obxetu preferente de la investigación antropolóxica y sociolóxica, pola mor de la so persistencia nos más estremaos modelos sociales, y tamién poles variaciones y adaptaciones qu’a lo llargu del tiempu se fonon produciendo na so apariencia y na so visualización social. Poro, aparentemente son de lo más estremao los procesos d’aceptación de nuevos miembros nes bandes urbanes de la periferia de Los Ánxeles, de les ríxides lliturxes de les hermandaes d’estudiantes na mui civilizada Universidá d’Oxford, onde los rapazos de les élites ingleses continúen los sos procesos de socialización, enantes entamaos nes escures aules de los caros internaos privaos.

La necesidá que tien cualisquier colectividá de proporcionar elementos simbólicos de reconocimientu colectivu ye un fechu obxetivu, que vei más alló de les coyuntures hestóriques, de los petites estéticos y de la inmediatez de les comenencies polítiques. Y nel casu asturianu, estos elementos, mesmu los rituales que los de reconocimientu colectivu, carecen d’una estigmatización viniente del so aniciu campesín, del so caltenimientu a lo llargu del tiempu nes clases populares y del so usu folklorizante y segregador dende les élites sociales asturianes. Asina, dende la llingua a la música tradicional asturiana pasando pol paxellu, l’espaciu social de la cultura asturiana vien siendo definíu dende posiciones de non apreciu, que furnen una categorización de les espresiones culturales asturianes viniente d’una suerte de racismu cultural, que vei de la negación a la ridiculización. Porque la visualización d’elementos culturales asturianos n’ámbitos d’aú tradicionalmente taben proscritos –el paxellu tradicional n’actos de sonadía social y mediática, por exemplu--, xenera una incomodidá, una rocea, que vien de la confrontación simbólica que supón la ocupación d’espacios sociales de los qu’un infamante consensu non esplícitu los caltenía alloñaos. Un consensu forxáu col fierro del despreciu y la vergoña. Un consensu fechu pa rompelu.