Senachie, seanchai: esi yera’l nome qu’en gaélico irlandés teníen los cuntacuentos tradicionales, y de los que cada comarca, cada condáu de la Isla, disponía de los de so. Heriedes –conscientes, en dellos casos—de la tradición, calteníen colos sos rellatos l’atención d’unos auditorios nos que’l contraste ente una vida conxugada con dolor y crueldá, y los cuentos y hestories de reis, guerreros y valentones, operaba como espaciu de reconocimientu colectivu, como un requexu d’aquella tierra mítica de los hérues gaélicos, siempre lluenxe, siempre al otru llau de la mar. Na so voz taba’l formientu de la renacencia nacional irlandesa de los años finales del sieglu XIX. A ellos acudienon Lady Gregory, W.B. Yeats o Singe, pa reconstituir la narración hestórica del so pueblu, l’irlandés.

Pero tres la lliberación, tres la firma desgarrada de la Partición el 6 d’avientu de 1921 y d’una ratificación el 8 de xineru de 1922 qu’anunciaba una temible guerra civil, cientos de mozos irlandeses en bicicleta emprimanon a percorrer la verde Erín. Equipaos con una pesada grabadora que furrulaba colos pedales de la bici, recoyenon de la boca d’estos senachie lo que camentaben que yera una memoria agónica, a piques de dilise nun mundu que yá malapenes reconocíen como propiu. Al empar, nes escueles del Estaú Llibre d’Irlanda, los neños poníen en papel los cuentos, cosadielles o cantares que sentíen en casa, afalagaos poles primeres promociones de mayestros formaos nuna República acabante de nacer ente sangre y sufrimientu. El resultáu: cientos y cientos d’hores de grabación, más de dosmil volúmenes manuscritos, esto ye, la memoria viva y dolorida d’una Irlanda puxando por renacer. Como se resumiría, años depués, na imaxe noble y arguyosa d’un vieyu, Sean Ó Echoid, cuando nos postreros años de la so vida la Universidá d’Irlanda reconocíalu como doctor honorariu. Yera’l simbólicu agradecimientu d’una nación a un home que nos años 40 y 50, nel so Donegal de nacencia entrevistara a más de 1500 senachie,rescatando un patrimoniu colectivu col senciellu instrumentu de la so voluntá.

Quiciabis la mesma voluntá de resistencia que va unos trenta años afalagó a un puñáu de mozos asturianos a volver a mirar, a sentir, a salvar, lo que dicía, cuntaba y cantaba la so xente.