Tien la presencia de Santana de Montarés no cimero del monte, un dalgo tranquilizador pa los que nacimos a la so solombra. Porque Montarés ye un monte, pero tamién ye una ermita, qu’anantes foi albergue de pelegrinos del vieyu camín francés, la ruta costera qu’emberedaba a caminantes y devotos a la llanada de Compostela. Y tamién Montarés ye Santana, santa milagrera, xenerosa: rustiendo pel cuerpu unes gastaes cadenes de fierro protexe de malures y dolencies, cura enfermedaes, torna al abellu del llar los deldos perdíos nes engurries de la vida y protexe a pixuetos y marinos de les traiciones y galernes de la mar. Poro, les paredes de la capiella tan estraes d’ex?votos: remos, bierzos, muletes,... obxetos vinientes del sufrimientu, d’esi dolor pal que nun s’albidra consuelu, pal que nun s’espera aliviu.
Como ex-votu nun dexa ser una llastra de pizarra na que’l mio pai, la mio mai, tíos, tíes, y parientes más o menos llonxanos grabanon, na tarde encesa d’un branu de 1955, los sos nomes, la so invocación a la permanencia nuna memoria secreta, memoria de piedra nes muries de la ermita.

Santa viaxera, santa milagrera: atopóse la so imaxe cola de La Dama ?misteriosu personaxe que nun concasa con nengún elementu del panteón católicu, desapaeciendo la so imaxe nos años de la Guerra Civil?, nun sarréu de cote a la Concha Artéu, non mui lloñe del monte. Monte nel que la santa apaecía toles mañanes anque la volvieren a la Ilesia de Piñera, monte al que s’allegaben les piedres de la ermita que-y taben construyendo nel llanu, con testerona pacencia aldeana.

Monte que ven los marineros dende la mar, que ye la tierra, la casa, la vida. Monte al que se xube como romeru y báxase como pelegrín. Monte qu’ordena y mira la vida de marnuetos, vaqueiros, xaldos, pixuetos y caizos: la fiesta’l 26 de xunetu ye la danza Santana cuando la tarde apigura y los círculos de brazos xirando son una cellebración, l’arguyu compartíu de nacer a la solombra de Montarés.