Viñas verdes cara la mar, nos lladrales d’una llomba de la qu’abaxa un caleón a la solombra, al arrecendor de los pinos. Ya’l caleón allégase a una playa llarga, d’arena blanca y fina, na que’en dalgún momentu unas rapazas dexanon perdese las sous risas al sol de la tarde. Como esas risas que se derroucan de las muyeres d’un cuadru de Russinyol, ou del llenzu d’aquellos pintores anónimos que nos anicios del sieglu XX esconxuranon las sous veleas de gloria ya eternidá, atrapando la solombra leve que l’aire del Mediterraniu pousa na piel d’una rapaza. Testigos de la “renaixença” d’una tierra a la que miraban al tresvel de los colores d’una paleta d’óleos. Pintores d’una lluz tresparente, adicaban los aires de la modernidá cola inxenuidá de quien espera dexar al futuru heriede de los suaños d’acolumbrar el rostru esplandiente de la fama.

Viñas verdes, tamién, al ablugu de la tramuntana nas más arispias tierras del Vendrell, del Priorat o Penedès. Pero ellí son “rabassaires” argullosos los que suañan, non cola fama ou la gloria incierta de los salones burgueses, sinón cola verdá d’un mundu que s’esgorrombla na povisa de la miseria. D’un mundu del que surdirá outru mundu d’homes y muyeres llibres. Y organízanse y organizan la resistencia colos obreros de las ciudades ya villas, d’una Barcelona que medra como una bestia mitolóxica qu’estrapalla a los sous fíos. Foi como se miles ya milenta xentes tomaran conciencia ya foran conscientes del tiempu presente que vivían. Como na Barcelona Revolucionaria del 36, que foi’l centru del mundu mentanto las milicianas salían como cíclopes –asina escribía Albert Camus de los revolucionarios asturianos—del fondu del esqueizu, ya fusil al llombu buscanon el sou llugar nun mundu yá irremediblemente esñizáu.

Milicianas, muyeres llibres, de las que dalguna d’ente ellas quiciabes fora una d’aquellas rapazas que fendía’l sable d’una playa llarga ya blanca, mientres dalguién y-arroubaba la sorrisa pa pintala nun cuadru modernista.