Ía la vecindá condición ambivalente onde las haiga, pues, d’una banda una persona dende la sou circunstancia individual exerce de vecina d’outra, ya al empar, esa mesma persona dende la sou pertenencia a una colectividá, suma vecindades. Porque ía vecín en cuantu habitante d’un llugar, pueblu ou aldea. Ya tamién dende la sou ciudadanía d’un país, estáu, nación ou confederación. Amás, según la tensión circunstancial, esa pertenencia ya oposición a estremadas comunidades xenera discursos, que van dende superponibles a contradictorios. Ía qu’esa condición de vecindá da llugar a la constitución de modelos d’oposición ente las colectividades en contactu col envís de furnir la pulsión de pertenencia. Ya nun ía outra la manera na que se constitúin los “caracteres nacionales”. D’estamiente siempre los habitantes de los pueblos de contra’l monte son xabaces, primitivos, pero nobles. Los del llugar d’al llau, fuinos, rapiegos, atuñaos, anque fatos. Ya asina, espardiendo las llendes al empar que los discursos d’identidá van definiendo las comunidades étnicas, estos modelos de comportamientu colectivu algaman el llugar del tópicu. Estos estereotipos, que nun deixan de ser elementos de cohesión interna, tienen el valir d’espeyar dalgunos de los elementos qu’inciden na imaxe que de sigo mesma tien una comunidá nacional. Ya de la imaxe qu’ellabora del vecín. El problema xurde cuando la mala vecindá asienta na frontera ya enllamuerga’l calce que lleva los fluxos d’información d’una a la outra veira. Pero de la mala vecindá, la peor ía aquella na que’l vecín perde fasta la condición de talu, bien sía por asimilación ou por negación. Por asimilación, ou cuando dende la veira que se cree faltosamente na condición de metrópoli, afírmase que las xentes ya tierras vecinas en realidá son propias ya pertenencen a una gran nación imaxinada nas veleas del irredentismu. Ya por negación, cuando dende la mesma veira niégase al vecín la condición de suxetu políticu protagonista de la sou propia hestoria, niégase fasta’l llugar que nel mundu vei inscribiendo la voluntá común d’articulase como pueblu.

Ya, precisamente, esa ía la mirada torcida que dende l’ueste del Eo, el galleguismu pousa nesti llugar onde’l mundu garra’l nome d’Asturies.