Tienen les verdaes revelaes un raro atractivu nos tiempos escuros. Son abellugu que permite, cuasimente, tresferir la necesidá de pensar: namás cola repetición complaciente yá se xenera un asentimentu xeneral. Trátase de reconocese nuna sensatez consensual, esto ye, nun pautu qu’evite, repito, esa inconveniente zuna de pensar. Y en cuantes esa verdá algama una utilidá política, conviértese en doxa: nuna norma d’obligao cumplimientu. N’Asturies, a lo llargo de la so hestoria comtemporánia, ye posible asistir al perfeccionamientu d’un conxuntu de verdaes qu’estructuraríen el ser colectivu del país. A cencielles, esi constructu sería a agrupase baxo’l conceptu de “cuadonguismu”, una llínia argumental que desplicaría’l devenir hestóricu d’Asturies dende la subsidiareidá a la construcción d’España. D’una banda, tien una innegable eficacia nel imaxinariu colectivu asturianu: Asturies como bierzu y orixe de la nación española, y d’otro, dexa afitar una contiuidá na permanencia d’una cierta idea de lo hispano, garrando la romanidá como elementu civilizatoriu y consolidador d’esa hispanidá. Amás, una de les mayores virtualidaes del cuadonguismu taría na so tresversalidá, na so asunción per toles clases sociales y en sacalo de la discusión y la controversia política. Asina ye dable entender porqué’l debate alredor de delles cuestiones hestóriques –dalgunes d’una complexidá metodolóxica importante—algama una virulencia sosprendente. La categorización d’Asturies como país celta, la constatación de la romanización más como episódica que como constitutiva, ruempe col aniciu d’esa llinia de continuidá de la romanidá como cementu civilizatoriu, ya impugnaría la base mesma del cuadonguismu. La persistencia na tardorromanidá y na fin del Imperiu d’estructures xentilicies, impediría considerar al reinu d’Asturies como orixe d’España, al afitar la ruptura del ordo góticu cola monarquía de los Príncipes.caudiellos. Poro, la necesidá de dotar a la doxa cuadonguista d’un sóledu argumentariu tendente a demostrar la visigotización temprana del Reinu, asina como la so pulsión reconquistadora de magar el princeps Pelayo llevantó espada y bandera en Cuadonga: trátase de dar potencia simbólica a esa imaxe paradigmática de Pelayo tendiendo la mano al actual xefe de la Casa de Borbón, qu’anguaño disfruta del empléu de Rei d’España.