Nun hai un corpus teóricu alredor de la señaldá que dea cuenta de la particular manera de tar nel mundu los habitantes d’esti llugar onde la tierra garra’l nome d’Asturies. Haber, realmente, nun hai nada. Y ello, ensín necesidá dala de faer comparances cola fina percepción que de la saudade tienen per tierres portugueses, cuasimente allegándose a constituir toa una socioloxía; o cola morriña gallega, otra miente d’antropoloxía del ser gallegu. Lo cierto ye que nesi sieglu XIX onde paez que nun pasaba nada --pero qu’en realidá lo que pasaba yera lentamente la vida porque la velocidá entá yera namás una fórmula física--, la cristalización romántica de los caracteres nacionales foi garrando perfil y sustancia. Y unos pueblos pasanon a ser reconocíos y conocíos en función de virtúes llargamente forxaes nel tiempu, y otros namás siguienon apigurando nos márxenes anónimos de la hestoria. Yeren virtúes feches de la materia de los hérues, aquelles que valen pa mirar en tientes al futuru y arguyosu al vecín. Y hérues yeren lo que sobraben nes epopeyes al traviés de les cuales los individuos reconócense colectivamente como pertenecientes a un llugar nel qu’unos homes-y dieron nome. Asina que morriña y saudade investían a los sos portadores de les virtúes romántiques de la borrina, de la sensibilidá de quien sane interpretar los signos del aire. Acudiendo a fontes pareyes pa calicatiar no que los eruditos románticos que s’ocupanon del “alma del pueblu” asturianu pensaben del mesmu, nun hai nada equivalente a una “teoría de la señaldá”. Y da igual que na lliteratura tradicional, la resquiebra de dexar la tierra fora poco menos qu’un topoi. La incapacidá de mirar a los campesinos asturianos como suxetos activos de la so esistencia revelaba yá una de les zunes que fexo tan abegosu entender, precisamente, el llugar d’Asturies nel mundu. Una suerte de non-apreciu, que caltenía una tensión trivial ente la idealización pastoril d’una arcadia qu’enxamás esitió y la zafiedá pataya del aldeanu cuziu y mísere.