Ún de los fenómenos más paradigmáticos, que más define les rellaciones sociales d’esta dómina d’entesieglos, ye la tresformación de les cases en viviendes. Esto ye, trátase d’un procesu pol que s’esanicia de la casa’l so valir como espaciu antropolóxicu y de reproducción cultural, y namás se rescampla la so utilidá financiera. Pero esta desplicación, con ser real, nun da cuenta de tola complexidá d’un fenómeno qu’entaina na tresformación dramática de los espacios urbanos y na suburbanización cochambrosa de les periferias rurales. Un fenómeno con repercusión directa na vida de millones de persones, y que vei más alló de la apropiación privada d’un espaciu físicu. Porque la construcción en xeneral, y la construcción de viviendes en particular, algamó una centralidá apavoriante na vida económica y social del mundu occidental. La potencia económica d’esta actividá, asina como la opacidá que l’arrodia, determina la so influyencia nes polítiques d’ordenación urbana, de mediu ambiente y de diseñu d’espacios comunitarios.

Un factor impoprtante ye’l preciu disparatáu qu’algamó la vivienda nos postreros años. Esi preciu nun ye consecuencia fatal d’un azar caprichosu ya imprevisible, sinon frutu directu de les decisiones tomaes en política económica y de la complicidá de políticos profesionales con promotores y constructores. D’una banda, esti preciu supón un mecanismo de distribución de renta perversu: esto ye, el preciu de la vivienda redistribuye un volume inmensu de rentes del trabayu al capital financieru y especulativu, al traviés de los creítos hipotecarios bancarios y de los precios usureros de les viviendes. Y son precisamente la esistencia d’esos creítos hipotecarios –imprescindibles pa pagar la usura del preciu actual de la vivienda— un perfectu mecanismo de control social: la necesidá d’atender al pagu de los plazos hipotecarios supón una dependencia directa de les decisiones polítiques que condicionen los tipos d’interés --cuya suba allanciaría a bien de familias al impagu, y, poro, a la quiebra de la feble economía familiar--, asina como una sumisión fatalista a condiciones de trabayu de dómina preindustrial.

La sosprendente inutilidá de toles midíes que dende les instancias polítiques tenten d’ordenar y regular la l’accesu a la vivienda, obedez a la real falta de voluntá pa qu’eso ocurra realmente. Pues los inereses qu’informen les prioridaes de los políticos profesionales son los interese del oligopoliu de la construcción, que pa eso-yos paguen.