Ye la condición de víctima una de les más esbarioses del tiempu presente, o del “espíritu del sieglu”, como diría Julio Camba, o dalgún otru d’aquellos irrepetibles periodistes de la II República. Porque a les revesoses dificultaes p’apautar una definición de víctima al preste de tolos actores sociales, súmase la estremada procedencia de la dicha condición de víctima. Y ye precisamente la procedencia la que fatalmente vei determinar los conteníos y la presencia pública de tala víctima. Y, ciertamente, asístese a un endelgazamientu d’esa condición: yá les víctimes de la fame, de les guerres, de les catástrofes naturales o menos naturales, son cada vuleta más invisibles, o menos visibles, que nun ye esactamente lo mesmo. Y víctima vien a ser sinónimu d’obxetu sufriente de la violencia política. Pero non tampocu de cualisquier violencia política –obviamente, nun ye lo mesmu un campesín asesináu por un comandu paramilitar, o un opositor secuestráu poles Policíes corruptes d’au seya, qu’un políticu a quien manden a los cielos bomba mediante--, sinón de la violencia política de tipu terrorista. Pero sigue siendo abegosa l’ambigüedá moral y política que lleva implícita’l términu, polo que tamién ye imprescindible afitar qué s’entiende por “terrorismu”: la hestoria amuesa cruelmente que non tola violencia política amerita l’axetivu famosu. Asina, coincidentes n’espaciu y tiempu, los mercenarios antisandinistes na Nicaragua de los años 80 yeren pa los gobiernos occidentales “combatientes de la llibertá”, y unos kilómetros más alló, la guerrilla guatemalteca que lluchaba contra la dictadura militarqu’enllenaba muerte y destrucción la selva centroamericana, esa sí yera “terrorista”. Poro, pa evitar los interminables enguedeyos terminolóxicos, derivaos bien d’ellos de la inxenua condición humana, y col peligru asociáu de la controversia y el disensu, fondamente dañibles en tiempos de peligru como éstos, allegóse al alcuerdu –otru “consensu de Washington”—de que terrorista ye aquella condición qu’adxudiuca’l Departamentu d’Estáu de los Estaos Xuníos de Norteamérica.

Y amigu de los terroristes, quien que lo discuta.