Probatiblemente, ye’l progresu ún de los conceptos de xeometría más variable de tolos que se remanen nel argumentariu de les polítiques concretes. Nun hai disparate arquitectónicu, obra estúpida ya innecesaria o industria porcaz y contaminante, nos que nun s’invoque al progresu como puro ya inmaculáu elementu basal na esposición pública de motivos y xustificaciones. El progresu conviértese en sinónimu d’esos cientos de chaletes adosaos que como una maldición tan emporcando la, fasta agora, maravillosa rasa costera asturiana, d’eses mines a cielu abiertu que se tresmuten --¡Oh, misterios de l’alministración pública!—en industries tresformadores de la basoria estranxera, conviértese, tamién, en trasuntu de carreteres cuya única virtualidá ye la so construcción. En fin, ye’l sinónimu d’esa xestión de la cosa pública que camuda’l valir de les palabres y fai propaganda cuando malinforma: del desarrollu sostenible pásase al sostenimientu de los palos de golf y les recalificaciones urbanístiques a la carta, del miedre autocentráu a la depredación xabaz y pataya. El progresu, aquello que queda siempre n’otru llugar, que nun s’algama enxamás porque opera como una realidá virtual de visualización cambiante y zuniega. Poro, la impunidá de la so invocación p’anubrir na eufonía de la so enunciación la cotidianeidá de corrupción estructural y xestores de cacharru en puticlub, pa roblar alcuerdos urbanísticos. El progresu son eses periferies de caos suburbanu onde s’entemecen nun decoráu puercu y desoláu naves industriales, restoranes de carretera, eminentes mueses de narcoarquitectura, puticlubs, caseries terminales, chaletinos, bloques de pisos como compitiendo n’algamar el finxu de la fealdá, y solares n’espera de la xenerosidá que pal progresu siempre tienen l’alcalde y el conceyal del ramu. Eses periferies que yá dexanon de selo, pa convertise nel paisaxe continu d’esa babayada teórica –una velea más de la incompetencia sociolliberal—que ye la “Ciudá Astur”. Un progresu, en fin, que se resume nel volume de les cuentes corrientes d’aquellos que saben ver nos proyectos políticos, proyectos personales.