You conocía la Bretaña armoricana enantes de pisar las sous caleas, de travesar los sous caleones abesíos, d’aldovinar los sous carreiros, aquellos que terminan a la vera d’una ilesia pequeña de granitu, aú Dious comparte altar ya cultu con santos viaxeiros ou pelegrinos, siempre invocaos con nomes d’una rara harmonía: san Ronan, san Gildas, san Gwenolé, san Connec, san Évarzec, san Brandan..., ente más outros.

You conocía yá la Bretaña enantes d’abicar los cantiles de Penmarc’h, de mirar la sablera inmensa de Kerlaz, d’ecoyer ente los caminos qu’enveredaban a Douarnenez ou a Kemper.

You yá sabia de la Bretaña enantes de que la lluz oblicua d’una tarde d’abril degolara del outru llau de las cousas ellí por tierras de san Renan, nel Pen ar Bed, na fin del mundu. N’outra fin del mundu. Un mundu viniente d’una memoria atoupada ente los resclavios de la propia memoria. Porque se yá conocía la Bretaña yara porque vi la mar dende los cantiles de Vidio yá dende neñu, cuando’l tiempu ía tovía un accidente intrescendente; ya porque nel cai de Cuideiru, un día de Santiago sentí falar de galernas, col respetu antigu que se tien a la mar, cuando s’invoca a los muertos que nél quedanon pa siempre enxamás. Porque yá conocía la Bretaña des qu’acolumbréi’l Picu Castru dende’l cruceiru que da anuncia de que los romeiros ya pelegrinos s’allegan a Sant’Ana de Montarés, ya darréu pidin a la Santa que veno de la mar nuna barca de piedra polos que yá nun tan, polos que quedan ya polos qu’en lenta procesión dan siete vuoltas a la capiella ya espuéis danzaran el círculu siempre nuovu, siempre vieyu de la Danza.

Porque yá conocía la Bretaña fui quien a dir a conocer la Bretaña como aquel que vei d’un llugar al mesmu llugar, ya más qu’un viaxe fai un retornu. Fai una vuolta a casa.