L’esqueirar pente las engurrias de la hestoria en cata de nobles antepasaos ía más que costume, zuna de cualisquier discursu identitariu nel que resone la voz de Fichte, la voz d’esos prerrománticos discursos a la nación alemana. Pero, que naide lo esqueiza, yera la de sou una voz encesa que clamiaba pola llibertá de las tierras xermánicas, sutrumidas polas tropas de Napoleón nesi añu yá familiar de 1808. Ya una voz qu’anunciaba a Hegel, non a Spengler, por muncho que fora un pensador constitutivu na creación del sentimientu nacional alemán.

Ía como se l’acumular fechas, nomes de caballeiros ya guerreiros, batallas, guerras ya griescas, santos, santuarios, hérues ya mártires, fora una enunciación de la consistencia d’una comunidá nacional. Ya aquella probe xente que non fora quien a presentar en nómina un báramu d’ilustres predecesores, protagonistas de xestas ya fazañas, nun ameritarían el nome de pueblu, ya muncho menos el de nación. Asina que, davezu, las lliteraturas s’atoupan na curiosa situación de reconstruyir –ou, directamente, construyir—aquellos elementos simbólicos que doten de coherencia a una comunidá humana. Lo cierto ía, qu’abulta muncha xera pa los escritores ya’l sou solitariu viciu de mirar el mundu, ya qu’en non poucos casos raspia la incómoda condición del patetismu. Como esos pesaos escribidores que dende 1939 dedicánonse na Francia oucupada a la inventatio d’una “revolución nacional” a la solombra beata ya maurienta del Mariscal Pétain; porque resulta que se a Drieu la Rochelle ya a L.F. Celíne sálvalos del infiernu del escaezu, el sou talentu ya’l tráxicu destín de los sous suaños d’un fascismu ilustráu ya heroícu, a la mayoría de los sous outros compañeiros de velea, la sou valeira retórica mángalos directamente nel ridículu llugar de los imbéciles. Se, ciertamente, l’exemplu ía estremu, la función amanuense ya aúlica de los escritores –funcionarizaos ou con vocación de selo--, non. Función, d’outramiente, que debería figurar nos méritos de non poucos profesionales de la cousa lliteraria.

Poro, una cierta distancia irónica cola real importancia de lo escrito nel dir ya venir de las sociedades, supón cuasimente condición necesaria d’una lucidez que dexe albidrar pente los artificios de la lliteratura, la presencia de la verdá.