Afirmen los filósofos de la ciencia que’l pasu del pensamientu máxicu al pensamientu científicu foi la clave de bóveda de la cultura occidental. La confianza nel futuru, l’optimismu –un aquel inxenu, ye verdá—na tecnoloxía como camín qu’enveradaría a una sociedá cuasi ensin sufrimientu y ensin carencies materiales, fonon la conxugación apasionada del progresu na modernidá. Pero’l suañu finó con un cruel y noxentu pesadiellu pingando del sieglu XX: les dos guerres mundiales, los xenocidios y l’equilibriu nuclear fexenon esconsonar a les sociedades desarrollaes a la realidá más devastada, a la realidá onde remanecen fondeaes les esperances de la razón.

Pero asina y too, lo científico trescaló en tolos órdenes de la vida cultural, social y política, neto qu’una poderosa taumaturxa. Y ye que la so invocación nos más estremaos –y tamién disparataos—asuntos oficia de cierre, de piesllu a cualisquier controversia o impugnación. La verdá –asina, n’absoluto—surde de la ciencia como antaño surdía de Dios. Y si nun entamu, nel alborecer del positivismu, la ciencia tentaba de describir los fenómenos naturales lo más cercano posible a la so sustancia y constitución real, anguaño la ciencia opera como una relixón otorgada. Una relixón otorgada colos sos sacerdotes como oficiantes: los científicos. D’estamiente, una enunciación dexaría de ser una opinión pa convertise na verdá si quien la emite ye un “científicu”. Pela cueta, la inflacción de disciplines que s’adxetiven de ciencies, --nun procesu de confusión epistemolóxica ente tecnoloxía, metodoloxía, disciplina y ciencia--, nun dexa de medrar: de la ciencia folclórica a la parapsicoloxía, de les ciencies humanes a les ciencies xurídiques. Toa ária de conocimientu que nagüe pola so reconocencia académica y social, inevitablemente en dalgún momentu invoca la so condición de ciencia o científica, que nun ye esactamente lo mesmo. Pero con ser ésti un asuntu curiosu, lo más entá curiosu ye l’abondosa presencia na vida política y mediática d’un tresmontoriu de “científicos” o “espertos” –nuna suerte de sinonimia perversa, na que nadie nun ye espertu en nada si nun ye un científicu--, qu’intervienen na controversia pública d’una miente foina: al sacar la discusión de la controversia socio-política y allugala na ciencia, el debate democráticu fúrtase a la colectividá en cuenta d’un “rigor científicu” siempre unidimensional, siempre apriorísticu.