Son los chigres llugares de difícile clasificación. Especialmente anguaño, porque al empar d’una tabierna son tamién bares, colmaos, tiendes, o híbridos, una mezclienda de tolo anterior. Nun principiu someyaría más cenciellu describir estos sitios na Asturies tradicional; pero tampocu nun ye asina. Son dende tabiernes pequeñes a tasques, o llugares aú se viende sidra y vino al por menor, bar con tienda d’ultramarinos y delles otres mercancies, o almacén con serviciu de bebides. Como se ve, una polisemia que respuende a una multifuncionalidá viniente de l’adaptación a los petites d’unes comunidaes onde se tentaba de resolver les necesidaes de socialización. Porque nun yera abondo coles figures qu’ufiertaba la cultura tradicional –el filandón, los calechos, los esfoyones, los magüestos, ente más otros, ensín escaecer les fiestes patronales ou otres cellebraciones del calandariu festivu asturianu--, al restrinxise los participantes nesos eventos a los más averaos a núcliu familiar. Yera precisu esternalizar les posibilidaes de rellación social, y ensín depender de los vezos del calandariu. Y pa ello los chigres amosanon que yeren un instrumentu bien afechiscu, pues per ellí paraben tratantes, feriantes, ganaderos y aldeanos, en fin, viaxeros de toa triba y condición, llugareños y foriatos en xeneral. Amás de los chigreros, personaxes célebres, qu’en dellos casos a piques tuvienon d’enxertase na mitoloxía local. La hora de la partida d’una banda, cuando los homes del pueblu aprovechaben pa sentenciar y falucar, y d’otra la de la compra, cuando les muyeres s’averaben a mercar cualisquiera de les inverosímiles mercancies qu’ufiertaben esos establecimientos, suponíen un mecanismu informal de caltenimienmtu de les redes sociales de solidaridá, nes que’l re-conocimientu mutuu yera básicu. Pero cola implosión de la sociedá rural tradicional, estos llugares inclasificables entamanon una lenta, inesorable estinción. Precisamente pola so condición inclasificable fonon víctimes predilectes de la estupidez alministrativa. Y otra circunstancia clave foi la creciente urbanización de la sociedá asturiana, cola incorporación de costumes y zunes vinientes d’una uniforme cultura dominante d’aniciu anglosaxón. Asina que l’adaptación d’estos vieyos chigres a les necesidaes d’una sociedá urbana, en constante procesu de cambiu, supón una interesante amuesa de lo que pue ser la sociedá y la cultura asturianes del futuru. Y los primeros pasinos –vala l’exemplu d’esos chigres celtes-- yá entamanon a dase de vei unos trenta años con bon xeitu.