Vei Asturies camín de convertise nun estrañu llugar de cementu y formigón. La tresformación traumática del paisaxe asturianu nestos postreros trenta años, pola so intensidá y radicalidá, paez más un fenómenu natural de calter catastróficu que’un procesu viniente de l’actividá humana. Y ye qu’esta velea de lladriellu y asfaltu, de natural nun tien cosa: trátase d’un asuntu con xenealoxía guapamente detectable nos procesos de toma de decisiones. Y tien el so aniciu –o’l so pecáu orixinal, pa ser más claros-- nun modelu de desarrollu de contrastada ineficacia, fracasáu nes periferies de los paises del centru del sistema-mundu, y qu’articula alredor de sigo umbrales de corrupción estructural difícilmente compatibles cola vida diaria de les instituciones d’una democracia formal. Anque esa democracia formal se dea na so versión holliwoodiense. Un modelu, qu’amás espórtase a los paises emerxentes d’Asia y América del Sur como camín perversu a unos mayores niveles de renta qu’enxamás se sustancien.

Y n’Asturies los efectos de too esto son especialmente dañibles pola mor de la desarticulación comunitaria d’una sociedá viviendo un tiempu crepuscular. Una desarticulación social que fai al mundu rural asturiana vulnerable a les más disparataes y estúpides ocurrencies. Ocurrencies nes que s’entemez el vieyu y maurientu desarrollismu industrial --que tien na industria estractiva la so espresión cuasi mítica--, con copies xostrones de proyectos ente lo anglosaxón y marbellí. Pero sabiendo que nel mediu urbanu –o meyor suburbanu—dominen les polítiques depredadores envolubraes nuna xerga socialdemócrata –o sociolliberal, tanto da-- aú la banalización del llinguaxe algama exemplos delirantes: dalgún imbécil xustificó la degradación de les ciudaes asturianes y la so perda de patrimoniu hestóricu-artísticu, acudiendu a una fata tradición de “ciudá compacta” que medra escontra los centros hestóricos, destruyendo memoria pa irguir una cartografía de non-llugares.

Cuando realmente lo únicu que se compacta ye’l formigón en cuenta d’ocultar l’ausencia d’idees, la complicidá col esaniciu: la xestión de la crisis como l’eficaz negociu de los canallas.