ASTURIES ye una nación con una historia propia, entendible de forma independiente y autónoma, coles lóxiques rellaciones y semeyances con otros pueblos, nel conxuntu de los países d'Europa. Nesti momentu históricu ye más importante que nunca remarcalo precisamente pola irresponsable omisión del Gobiernu asturianu que renuncia a la afirmación de lo que nos defín nun momentu de redefinición del modelu d'Estáu nel que les autoridaes asturianes paecen renunciar a xugar con voz propia, más allá del conocíu son que remite al servilismu y a la renuncia. Dende va más de trenta años, los dirixentes políticos asturianos son xentes antiautonomistes, que refuguen d'Asturies como suxetu políticu autónomu y soporten l'Estáu de les Autonomíes con estoica resignación nel meyor de los casos, pero siempre tentando de dexar valeru de conteníos el probe nivel d'autogobiernu asturianu.

Per otru llau la situación económica y social del nuesu país precisa d'un modelu afitáu na xusticia social, na llibertá, na igualdá y na sustentabilidá. Nun ye posible nin deseable un modelu qu'escaeza'l fortalecimientu de los servicios públicos, el mediu ambiente como bien irrenunciable perriba de los intereses económicos privaos, la igualdá de la muyer o la redistribución de les rentes. Nun ye de recibu un modelu que perpetúe o faiga xorrecer modelos clientelares y que lleven a una corrupción estructural que n'Asturies algama niveles intolerables con un Gobiernu supuestamente d'izquierda.

Especialmente importante nesti momentu históricu ye la supervivencia de la llingua asturiana, quiciabes la seña d'identidá que más defín la nuesa identidá como pueblu, que ye patrimoniu de toles asturianes y asturianos y que debemos curiar y tresmitir. Pa ello ye imprescindible y urxente la oficialidá, ensin retrasos nin matices, y la normalización social de la nuesa llingua, desaniciando les polítiques llevaes alantre pelos sucesivos gobiernos asturianos que nun empobinen más qu'a un puntu muertu y a la desapaición del nuesu idioma. Unes politiques de les que l'actual Gobiernu de coalición ye un fiel continuador.

Polo tanto, dende IAS lo oportuno pa esti 8 de setiembre ye negase al más de lo mesmo que nos ufierten los discursos oficiales del Gobiernu de coalición per un llau y del PP pel otru y entamar a articular un coherente discursu de resistencia, calcar na necesidá d'un cambiu de modelu económicu, social y cultural p'Asturies: un auténticu cambiu de paradigma nel que la llínia identitaria marque tamién les polítiques mesmo globalmente que na so articulación concreta.

Los y les militantes d'IAS escoyimos facer esti 8 de setiembre en Xixón una ufierta simbólica al Conseyu Soberanu de Asturies y Lleón porque pensamos que nesti momentu de redefinición del Estáu y de reforma de los estatutos d'autonomía ye mester recordar momentos nos que'l pueblu asturianu dotóse de mecanismos propios d'autogobiernu basaos na soberanía efectiva.

Dende Izquierda Asturiana (IAS) queremos tresmiti-y a los asturianos y asturianes nesti Día de la Nación un mensaxe d'esperanza y autoestima y un llamáu a la movilización social pa que'l nuevu estatutu contemple la oficialidá esplícita y ensin axetivos de la llingua asturiana -como únicu mediu d'asegrar el so futuru y igualala al restu de les llingües del Estáu- y pa qu'Asturies salga definitivamente del armariu y reclame la definición de nación, el términu que nos correspuende pola nuesa historia y pola nuesa identidá.

Articulu publicáu nel diariu El Comercio el
7 de setiembre de 2005