Dizse de la secta, que ye la doctrina d’un maestru, que foi quien l’afayó o desplicó, pero que ye seguida y defendida por otros, y tamién que ye relixón falsa ensiñada por un maestru famosu. Lo cualo fai albidrar que tendría d’esistir dalguna relixón verdadera, que vala de llende ente tala verdá, y los estravíos peligrosos y alloriaos, de cualisquier que crea lleer los signos de dios. Lo curioso ye qu’esti llinguaxe, ente apocalípticu y monxil, ye bien afayadizu pa describir comportamientos y acciones n’atros ámbitos. Y asina, el llinguaxe políticu añagó d’esti aire relixosu, más propiu de quien sigue los resclavios azarientos de la fé, que d’aquellos nos que la razón informa la so praxis política. Porque nun ye’l más pequeño de los peligros p’aquellos “reagrupamientos humanos” que tienen na tresformación social la llínia de xuntura de les subxetividaes, aquel de mirar al mundu dende fuera del mundu. O lo que ye lo mesmu, l’audiencia social algamada suel ser inversamente proporcional a les invocaciones –por ciertu, siempre con mayúscules en tientes de convertise n’acrósticu: Pueblu, Trabayador, Alzamientu,…-- a actuar nel nome der dalgo, de dalguién o de daqué. Anque ese dalguién, ese dalgo y ese daqué nun se dieren por concerníos. Nin traza d’ello paeza. Asina que la perda del principiu de realidá vólvese virtú, pues cuanto más alloñada permaneza esa inhóspita realidá, más coherente ye’l grupu. Trátase d’una coherencia delirante que violenta los fechos –esos cotidianos fechos que se describen dende los sentíos y cola xeometría euclidiana pentemedies— en función d’aquella doctrina revelada nel verbu ingriente d’un profeta o maestru: la coherencia perfecta de la simpleza simplaya. La dificultá de mantener un discursu dende la impugnación al mundu realmente esistente nun ye un pretestu pa la estupidez. Pola contra, les dificultaes obxetives que l’articulación d’una antagonía colectiva suponen, deberíen ser el meyor de los estímulos na enunciación d’alternatives prestoses, intelixentes, imaxinatives, radicales: na meyor tradición de la razón ilustrada. Porque, siguiendo a Gramsci, según pasen los díes y los años, la verdá ye cada vez más revolucionaria.
Y la coherencia nel error, l’abellugu de los imbéciles.