MANIFIESTU D’IZQUIERDA ASTURIANA (IAS) NEL ANIVERSARIU DE LA REVOLUCIÓN DE 1934

Un añu más, y con esti van 79, cúmplese l’aniversariu del asaltu a los cielos que protagonizó la clase obrera asturiana n’ochobre de 1934. La cabera revolución d’occidente, qu’amosó que la clase trabayadora xunta y baxo un oxetivu común yera quien a baltar toles estructures del vieyu orde. La insurrección defensiva, qu’amosó que yera posible encarar el faxismu que campaba per tol continente énte una esquierda impotente o desnortiada. La rebelión plural, qu’amosó que yera posible la unidá dende la diversidá baxo un programa y una estratexa compartida.

Pesie a les tonelaes de papel que s’escribieron sobre los acontecimientos d’ochobre, tovía queden una montonera de temes pa investigar sobre aquellos díis. Izquierda Asturiana (IAS) ye una organización política, y nun-y compete facer el llabor historiográficu, sinón afitar una posición política sobre la base del análisis de la situación que-y tocó vivir a los nuestros güelos y la que mos toca vivir güei a nós.

Por too ello, Izquierda Asturiana (IAS) quier manifestar a la opinión pública:

-Que xustifica dafechu la insurrección entamada pola Alianza Obrera n’ochobre de 1934.

-Que comparte los principios políticos que l’animaron, como son l’antifaxismu y l’anticapitalismu.

-Que, ensin comparar la situación europea de 1934 y la de 2013, entiende como vixentes, válidos y necesarios los principios de los homes y muyeres que participaron na revolución del 34 pa la situación que padecemos anguaño.

Cuando vemos pasu ente pasu esbarrumbar les conquistes sociales poles que llucharon y morrieron los nuestros antepasaos, cuando baxo la mázcara de la democracia l’actual réxime lliberal-sufraguista amuesa’l so tortoriu autoritariu ca vuelta que se recrudez el conflictu social, cuando vivimos una crisis sistémica del capitalismu européu que solo trai más sufrimientu, probitú y lladrociniu, cuando tamos ensertos nuna crisis del réxime restauracionista que mos funde ca vez más na llamarga de la indignidá colectiva, cuando les costures del estáu nacional español empecipien a rasgase pola sede d’autodetrminación de los sos pueblos, vemos más necesariu que nunca un cambiu radical a tolos niveles que vuelva a facer del pueblu asturianu únicu amu del so destín.

Güei como en 1934 l’amenaza d’una involución autoritaria ta sobre los pueblos d’Europa como una espada de Damocles. Vemos cómo medra’l faxismu y la ultraderecha en Grecia, en Francia, n’Austria, perdayures, y vemos tamién cómo los gobiernos formalmente de derecha lliberal, como l’español, amuesen traces ca vez más reaccionaries y enemigues de los derechos civiles.

Na Asturies de 2013 la clase obrera yá nun ye aquella masa de mineros y metalúrxicos que formaben un exércitu temible en 1934. Pero hai más asalariaos qu’en 1934 y sigue habiendo esplotación, precariedá y un futuru ca vez más prietu. Hai un pueblu sometíu a los dictaos de la Troika, a la tiranía del euro y la UE, a unes estructures polítiques que si nunca fueron válides, anguaño apaecen ridícules. Sigue esistiendo aquel capitalismu escontra’l que se llevantaron los homes y muyeres de 1934.

N’homenaxe a toos ellos, y porque güei sigue siendo más necesaria que nunca la llucha y la resistencia, Izquierda Asturiana (IAS) perafita’l so compromisu cola acción colectiva a la gueta d’un futuru meyor, más llibre y más dignu pal nuestru pueblu.

Güei, como ayer, fuercia y unidá hasta la victoria.

Dirección nacional d’Izquierda Asturiana (IAS)

4 d’ochobre de 2013

Los comentarios están cerrados.