mias>> llamenta les condiciones
del Asturies-España de balonmano
29/12/2007>> La organización moza amuesa'l so descontentu énte la forma en que se va disputar esti partíu, nel qu'una Asturies mui amenorgada nun va ser más que'l sparring pal entrenamientu y llucimientu de la "selección española", que va cuntar tamién colos meyores xugadores asturianos.
27/11/2007>> Los militantes de Mocedá d'Izquierda Asturiana tuvieron ente les cerca de 20.000 persones qu'atendieron pa la convocatoria del Conceyu Abiertu pola Oficialidá y se manifestaron peles cais d'Uviéu esti sábadu, baxo una lluvia insistente, pa desixir la oficialidá de la llingua asturiana y del gallego-asturiano nel so ámbetu, de cara a la próxima reforma del Estatutu d'Autonomía.
21/11/2007>>Mocedá d'Izquierda Asturiana llama a participar na manifestación pola oficialidá de la llingua asturiana (y del gallego-asturiano nel so territoriu) qu'entama esti sábadu 24 de payares n'Uviéu el Conceyu Abiertu pola Oficialidá, plataforma qu'axunta más de 250 organizaciones asturianes ente les que s'alcuentra mias>>.
La convocatoria inclui seis marches a pie dende otres tantes poblaciones de la xeografía asturiana, toes elles empobinaes a la Estación del Norte d'Uviéu, onde a les seis de la tarde va dar empiezu la manifestación.
A les puertes de la reforma l'Estatutu, ye pernecesario amosar la voluntá de la sociedá asturiana de consiguir por fin la oficialidá de la nuesa llingua pa garantizar la igualdá de derechos ente tolos ciudadanos d'esti país y la pervivencia d'esti elementu básicu de la nuesa cultura.
19/11/2007>>Mocedá d'Izquierda Asturiana participó activamente esti sábadu na manifestación convocada pola Coordinadora Antifacista d'Asturies, a la que se sumaron más de 1000 persones peles cais de Xixón. mias>> quixo, cola so pancarta, encamentar a la mocedá a dar "un pasu alantre contra'l fascismu".
14/11/2007>>Mocedá d'Izquierda Asturiana quier sumase a les abondes expresiones de duelgu, condena y murnia pol asesinatu en Madrid esti domingu 11 del rapaz antifascista Carlos Javier Palomino a manos d'un soldáu profesional del exércitu español y dar ánimu a los sos familiares, amigos y collacios; amás de deseyar y esperar la conderga merecida pal so asesín y les midíes afayadices pa que nun vuelvan a repetise fechos como esti, qu'amuesen a les clares la manera d'actuar de los colectivos fascistes, que solo son quien a llamar l'atención llevando per delantre vides como la d'esti mozu de 16 años. Carlos, descansa en paz.
_______________________________________________
contra'l fascismu d'ayeri y güei: llucha con memoria
12/11/2007>>Mocedá d'Izquierda Asturiana sofita la iniciativa de la Coordinadora Antifacista d'Asturies énte los habituales homenaxes fascistes al dictador Francisco Franco que tienen llugar nestes feches y la vergoñosa Llei de Memoria Hestórica aprobada pol PSOE, insuficiente dafechu pa coles víctimes de la represión franquista.
Asina, estos díes tan desendolcándose delles actividaes de calter antifascista y antirracista n'Uviéu y Xixón. L'actu central de la campaña ye una manifestación el sábadu 17 a les 18:30 hores, con salida na Plaza l'Umedal de Xixón.
15/09/2007>>Mocedá d'Izquierda Asturiana fizo un actu de protesta contra la política de festexos pal San Mateo d'esti añu que lleva alantre l'Ayuntamientu d'Uviéu gobernáu pol alcalde Gabino de Lorenzo, tresformaes un añu más nunes celebraciones ayenes a la cultura asturiana, desnaturalizaes y tresnochaes, especialmente cola inclusión, otru añu más y cola sovención pública habitual, del 'espectáculu' sangrín de les corríes de toros. L'actu desendolcóse aprovechando'l pregón de les fiestes esti vienres 14.
mias>> desixe que s'apueste poles selecciones deportives asturianes
12/09/2007>> Énte'l partíu que va disputar na capital d'Asturies la "selección española" de fútbol, Mocedá d'Izquierda Asturiana quier denunciar, amás del aprovechamientu d'estos eventos como actos d'adoctrinamientu y autoafirmación española, l'abandonu que carecen les selecciones deportives asturianes, dalgunes desaniciaes dende va años, como ye'l casu de la de fútbol.
26/06/2007>> Mocedá d’Izquierda Asturiana y Izquierda Asturiana (IAS) vienen participando estos díes nes movilizaciones convocaes pola Plataforma poles Llibertaes y contra la Represión en sofitu a los sindicalistes de la Corriente Sindical d'Izquierda Cándido González Carnero y Juan Manuel Martínez Morala, presos na cárcel de Villabona por defender el so puestu de trabayu tres un procesu irregular y una sentencia que pretende servir d'escarmientu pa los que lluchen pol so trabayu.
mias>> critica un nuevu ataque de Gabino de Lorenzo a les opciones d'ociu y cultura n'Uviéu
19/06/2007>> Mocedá d’Izquierda Asturiana amosó esti llunes el so descontentu cola llinia d’actuación anunciada pol alcalde d’Uviéu Gabino de Lorenzo, dempués d’unes declaraciones nes qu’aseguraba que diba entamar una “cruzada contra’l ruíu” na capital asturiana, cancelando asina toles fiestes y conciertos de nueche na ciudá, sacante les de Samateo.
Dende mias>> califícase de “escandalosa” esta midida, que va significar otru golpe a la ufierta cultural y d’ociu n’Uviéu, “un conceyu que yá carez d’una programación de conciertos a l’altura necesaria, obligando a los mozos y moces a buscar esti tipu d’actividaes n’otres ciudaes cercanes como Xixón que disponen d’una cantidá d’alternatives y de locales que multipliquen les de la capital”.
26/05/2007>> Tres l'éxitu del actu del día 11 en Mieres, Mocedá d'Izquierda Asturiana entamó otru conciertu'l vienres 25, esta vez en L'Infiestu, como pieslle de la campaña electoral d'UNIDÁ ya IAS-Asturianistes por Piloña. El grupu folk Llangres abrió l'actu sobre les nueve de la nueche, pa dar pasu a les intervenciones de José Ángel García "Allende", candidatu d'IAS a l'alcaldía; Germán Abad, candidatu d'UNIDÁ nel Oriente; ya Ignaciu Llope, candidatu a la presidencia d'Asturies. P'acabar, subió al escenariu'l grupu Skama la Rede, qu'allargó la folixa hasta cerca de la medianueche.
20/05/2007>>Mocedá d'Izquierda Asturiana tuvo presente esti sábadu 18, xunto a la Mocedá d'Andecha Astur na manifestación antitaurina convocada pola organización ANADEL n'Uviéu con motivu de la corrida de toros programada dientro de les fiestes de L'Ascensión.
Ye bien murnio qu'a estes altures entovía tengamos de movilizanos pola abolición d'un "espectáculu" xabaz y denigrante como son les corríes de toros, qu'amás nun cuenten con nengún sofitu considerable ente la población asturiano, sobreviviendo namás gracies a les sovenciones públiques col dineru de toos.
¡Corríes de toros: festexu criminal! ¡Abolición yá!
18/05/2007>>Mocedá d'Izquierda Asturiana y Mocedá d'Andecha Astur quixeron participar nel 17 de mayu, Día Internacional contra la Homofobia y la Tresfobia (IDAHOT), celebrando un actu reivindicativu na bárzana de la Estación del Norte d'Uviéu, en mediu de la feria de L'Ascensión, onde encolingaron una pancarta con motivu d'esta fecha.
Contra la homofobia y la tresfobia, ¡nin un pasu atrás!
_______________________________________________
mias>> con UNIDÁ nes eleiciones asturianes
14/05/2007>> Mocedá d'Izquierda Asturiana va tar presente nes eleiciones nacionales y a conceyos del próximu 27 de mayu al traviés de les lcandidatures de la coalición UNIDÁ, na que ta inxertu Izquierda Asturiana (IAS). Asina, miembros de mias>> van formar parte de les llistes d'Unidá nes trés circunscripciones y en 15 conceyos.
13/05/2007>> La mocedá mierense respondió a la convocatoria de mias>> esti vienres 11, enllenando'l pub Mausoléu y amosando'l so sofitu a la candidatura d'IAS-Asturianistes nel primer actu de la campaña electoral nel conceyu de Mieres. L'actu abrióse cola intervención del candidatu d'IAS a l'alcaldía, Faustino Zapico, que darréu dio pasu a les actuaciones de dellos nomes conocíos del hip hop asturianu, como son Arma X y 13 Palabras, siguiendo con un micro abiertu y acabando cola música lletrónico d'Huborge y Hugo Electro, pa llegar hasta les once de la nueche.
09/05/2007>> Mocedá d'Izquierda Asturiana organiza esti vienres 11 un actu electoral en sofitu a la candidatura d'IAS-Asturianistes nel conceyu de Mieres, qu'encabeza Faustino Zapico. Nel trescursu del actu, xunto a la intervención del candidatu, van actuar el raperu Arma X y el grupu local 13 Palabras, amás de la música lletrónico que van pinchar Huborge y Hugo Electro. La hora ye les 7 y media de la tardi; y el sitiu, el pub Mausoléu, na cai Covadonga de la villa mierense.
06/05/2007>> Mocedá d'Izquierda Asturiana tuvo presente esti vienres 4 de mayu, xunto a Izquierda Asturiana y UNIDÁ, na habitual manifestación pola oficialidá que convoca la Xunta Pola Defensa de la Llingua Asturiana con motivu del Día de les Lletres Asturianes.
Unes 2000 persones movilizáronse otra vuelta pa desixir el tratu que merez la nuestra llingua, nesta ocasión namás a trés selmanes de les eleiciones, lo que se notó na presencia de dellos grupos que davezu nun se preocupen tanto por tar nesti tipu d'actos.
Dende mias>> volviemos a recordar la negación de derechos que carecen miles de mozos y moces n'Asturies que nun pueden deprender asturianu nos centros educativos. Vemos claro que, más alló del incumplimientu de lleis que suponen estos fechos, namás hai una solución: ¡¡¡oficialidá agora!!!
20/04/2007>> Mocedá d'Izquierda Asturiana presentó esta selmana'l so blog de contracampaña al presidente asturianu, énte'l llanzamientu per parte d'ésti del blog “Asturianos por Areces".
La organización de mocedá arreyada al partíu Izquierda Asturiana, enxertáu na coalición UNIDÁ, amuesa'l so plasmu y repulsa énte una nueva aición propagandística y electoral encubierta del PSOE y de Tini Areces, una práctica que vien siendo yá habitual nos últimos meses, cola presentación de la supuesta iniciativa ciudadana “Asturianos por Areces”.
Nesta ocasión la campaña céntrase na figura del propiu presidente, Vicente Álvarez Areces, quien asistió personalmente a la presentación oficial el martes 10 d'Asturianos por Areces, que s'autodefine como “un grupu d'asturianos y asturianes que buscaben un cauce pa que cualesquier ciudadanu pudiere falar de tu a tu con Vicente Álvarez Areces”.
Curiosamente, la páxina web que concentra la información sobre la actividá d'esta organización da más la impresión de ser d'una especie de panexíricu qu'inclúi apartaos como un espaciu de semeyes de xente col presidente, amás d'un blog escritu pol propiu Areces, dalgo mui sosprendente pa una asociación independiente como diz ser esta. Amás resulta “chocante” que’l dominiu propiedá de “Asturianos por Areces” www.tiniareces.es seya l’únicu non rexistráu pol Gobiernu del Principáu como sí lo son los d’estensión .com, .org, .net etc.
El secretariu de nueves tecnoloxíes de mias>>, Xuacu Rodríguez, afirmó que “ye inaceptable la continua apaición d'esti tipu d'actos promocionales que pretenden a les clares engañar a la ciudadanía, lo cual amuesa amás el fondu despreciu que tienen los sos responsables pa colos asturianos y asturianes”.
Amás, Rodríguez destacó que “nos paez mui preocupante'l calter d'esaltación de la figura d'Areces que tien el web, nel que se fala del presidente con una grandilocuencia escesiva dafechu, como si d’ún semidios se tratare, dexando de lláu los pergraves problemes que carez Asturies y la so mocedá, que se ve obligao a emigrar forzosamente en decenes de miles tolos años pa vivir dignamente, anque él siga falando de lleendes urbanes”.
Ye por ello que dende Mocedá d’Izquierda Asturiana rexistróse’l dominiu en custión www.asturianoscontraareces.com, un sitiu onde recoyer el descontentu de la mocedá pa cola xestión del gobiernu del PSOE-IU, “probablemente la peor nos últimos trenta años pa la xente más mozo d’esti país, dirixida por un presidente que sigue faciendo negación de los nuestros problemes y tomándonos por tontos”, indicó’l representante de mias>>.
Gran seguimientu de la fuelga pola enseñanza
digna de la llingua asturiana
24/03/2007>>La fuelga convocada esti xueves por Xunta Moza y sofitada por Mocedá d'Izquierda Asturiana en tolos institutos asturianos pol derechu a estudiar asturianu algamó una participación curiosa en tol país, con un paru superior al 70% nos más de los centros. De la mesma manera, un cientu d'escolinos tuvieron presentes na movilización convocada n'Uviéu, baxando de la Conseyería d'Educación a la Xunta Xeneral pa reclamar los derechos más básicos: el derechu a estudiar la llingua asturiana, n'Asturies, nunes condiciones mínimamente aceptables.
mias>> tamién tuvo na manifestación, insistiendo nuevamente en que'l gobiernu actual de PSOE-IU nun quier facer otro que dexar el «"bable" nes esqueles», y repartiendo esa esquela na que nun queremos qu'acabe la nuesa llingua.
19/03/2007>> Mocedá d'Izquierda Asturiana sofita la fuelga d'estudiantes qu'entama Xunta Moza pal xueves 22 de marzu en tolos IES d'Asturies.
Esta convocatoria quier afondar nes nefastes consecuencies que pue suponer el nuevu currículu d'ESO y Bachilleratu propuestu pola Conseyería d'Educación del gobiernu de PSOE-IU, empeorando tovía más la situación de la llingua asturiana en secundaria, igual qu'en tolos niveles del sistema educativu. Yá nes condiciones actuales, munches moces y mozos nun ven respetáu'l so derechu a estudiar asturianu en bien de centros públicos de tol país, onde la llingua ye una simple asignatura optativa que depende d'un númberu mínimu d'alumnos o, en dalgunos casos sangrinos, nin tan siquier ye ufiertada oficialmente polos centros.
La convocatoria complétase con una concentración a les 12 hores énte la Conseyería d'Educación.
¡Llingua asturiana en tolos institutos, en condiciones dignes y de normalidá!
mias>> denuncia la "desasturianización" del Antroxu n'Uviéu
23/02/2007>> La organización de mocedá vinculada al partíu Izquierda Asturiana denunció ayeri en comunicáu de prensa remitíu a los medios la "desasturianización de la fiesta d'Antroxu na capital d'Asturies".
Clara Díez reprochó al alcalde Gabino de Lorenzo "l'enfotu qu'amuesa pa promocionar la Zarzuela madrileña en contraposición cola nula esmolición por defender les tradiciones milenaries de les asturianes y asturianos" esperando que'l propiu alcalde y los sos conceyales "tomen nota y faigan daqué no que cinca a esti fechu n'años vinientes".
18/02/2007>>Mocedá d'Izquierda Asturiana participó'l pasáu 17 de febreru na manifestación convocada pola Xunta pola Defensa de la Llingua y los sindicatos SUATEA, CCOO Enseñanza y FETE-UXT por una presencia digna y en condiciones de normalidá de la llingua asturiana nes escueles del país. Unes 2000 persones axuntáronse peles cais d'Uviéu, aguantando'l bastiáu d'agua que cayó nel trescursu de la marcha, pa reivindicar el derechu de los neños asturianos a deprender la so llingua.
16/02/2007>>Mocedá d'Izquierda Asturiana entamó'l xueves 15 de febreru, xunto al Sindicatu d'Estudiantes, una concentración en protesta pola agresión d'un grupu de siete fascistes a tres escolinos del IES Aramo d'Uviéu, un fechu asocedíu el día 9 d'esi mes cuando les víctimes s'alcontraben nel tiempu de recréu.
L'actu, qu'axuntó a unes cincuenta persones énte la facultá de Xeoloxía -llugar concretu de l'agresión-, cuntó cola presencia de dellos representantes de SUATEA y la federación d'enseñanza de CC.OO, amás de dalgunos profesores universitarios.
Iyán González, Secretariu d'Organización de mias>>, insistió nel papel qu'han desendolcar la Policía y la Delegación del Gobiernu nestos casos, en viendo la impunidá na que queden los culpables d'estes aiciones les más de les veces.
13/02/2007>> Les organizaciones de mocedá Chobenalla Aragonesista y Mocedá d’Izquierda Asturiana soliciten que, lo mesmo Asturies qu’Aragón, puedan disponer de dominios territoriales propios pa les sos respeutives comunidaes culturales y llingüístiques.
Esta vindicación súmase al proyeutu de collaboración en lluches sociales que mias>> y Chobenalla entamaron el pasáu añu y que dio llugar a la páxina web arast.net como mediu de comunicación propriu y nel qu’entrambes organizaciones van siguir apostando como voceru de les sos campañes na rede.
Contra la especulación, la corrupción y l’atentáu ecolóxicu:“Nin p’Asturies nin pa nengún sitiu”
12/01/2007 >> La organización de mocedá vinculada al partíu políticu Izquierda Asturiana (IAS) llevó alantre una aición el vienres 12 na que denunció la especulación y corrupción urbanística xunto col atentáu ecolóxicu descomanáu que ta careciendo Asturies.
Porque tamos contra la estroza de la nuesa naturaleza pal beneficiu de cuatro, porque creemos qu’otra relación col mediu y los recursos naturales ye posible, porque nun vamos aparar de denunciar estes constantes agresiones vengan d’onde vengan y seyan onde seyan... ¡nin p’Asturies nin pa nengún sitiu!
29/12/2006>> Depués d'esparder mas de 1.500 exemplares del cartafueyu na cai>> "el meyor homenaxe la llucha", onde informamos de les cuatro campañes, desendolcaes por Mocedá d'Izquierda Asturiana pa rememorar l'Ochobre'l 34, presentamos esti vidiu que recueye tol material gráfico que nos dexaren estes acciones reivindicatives, col que queremos poner un puntu, pero non final, a esta llucha qu'emprincipió va 72 años por unos valores que güei siguen vixentes.
19/12/2006>> Yá puedes topar na seición "na cai>>" de la nuesa web el númberu 12 del cartafueyu d'información de Mocedá d'Izquierda Asturiana. Nesta edición del mes d'ochobre, baxo'l títulu "el meyor homenaxe, la llucha" recuéyense les cuatro campañes que mias>> desendolcó pa rememorar l'Ochobre'l 34, actualizando y desixendo los valores reclamaos daquella:
mias>> antimilitarista
Despidiendo a les lleendes urbanes
Polos valores republicanos
Antifacismu
Calca equí pa descargalu. Amás, podrás topar el na cai>> na so versión impresa na to facultá, institutu, biblioteca, y nos centros culturales de la to ciudá.
02/12/2006>> Mocedá d'Izquierda Asturiana tuvo presenta na manifestación de miles de persones convocada güei n'Uviéu pola ACA (Agrupación de Colectivos Asturianos) pa denunciar la especulación urbanística y la llaceria medioambiental que carez esti País, baxo la responsabilidá del gobiernu de la "esquierda plural" del PSOE-IU-BpA y del PP.
28/11/2006>> Mocedá d'Izquierda Asturiana cellebró na tarde del vienres 24 de payares un actu énte la estatua de Teijeiro n'Uviéu pa desixir la retirada de los monumentos y señales del réxime que dirixere Franco.
Durante l'actu, espardiéronse dellos exemplares de la "Guía Antifascista d'Uviéu", un documentu nel que se recueyen una bona parte de los elementos que la organización propón retirar. Pa finar, lleóse un manifiestu pola retirada de la simboloxía franquista, documentu nel que se recueyen les principales reflexones al rodiu d'esti tema de la propia organización.
23/11/2006>>Mocedá d'Izquierda Asturiana amosó ayeri la so solidariedá con Cándido y Morala, sindicalistes qu'afronten 6,6 años de cárcel por defender el sector naval en Xixón, con la denuncia cómpliz de la autodenomada "izquierda plural" del PSOE-IU-BpA del conceyu xixonés.
La movilización axuntó a más de 10.000 persones que denunciaron la represión y la falta de llibertaes que carez Asturies nos últimos tiempos. Asina, IAS/mias>> espardieron miles de panfletos mui críticos pa cola posición d'IU-BpA, responsables, xunto al PSOE, d'esta escalada d'acosu a sectores como'l sindical, el de reivindicación llingüística, l'ecoloxista o la llucha contra la especulación inmobiliaria.
20/11/2006>>El Conceyu Abiertu pola Oficialidá (CAO), plataforma que cuenta con más de 200 organizaciones y coleutivos firmantes, ente los que tan Izquierda Asturiana y Mocedá d'Izquierda Asturiana, convocó'l pasáu sábadu 18 de payares una gran manifestación que percorrió les cais d'Uviéu, siendo asina una de les mayores movilizaciones de los últimos años en defensa de la oficialidá de la llingua asturiana.
Asina, IAS y mias>> llevaron la so reivindicación d'oficialidá a la sociedá asturiana y espardieron cientos de panfletos onde se facía un repás de la nula política llingüística del gobiernu de la esquierda plural formáu por PSOE-IU-BpA.
12/11/2006>> Mocedá d'Izquierda Asturiana entamó los díes 20, 21, 22 y 23 d'ochobre dellos actos republicanistes enmarcaos dientro de l'homenaxe que la mocedá d'esquierda alternativa y nacionalista fai nel aniversariu de la Revolución d'ochobre de 1934.
La movilización consistió na presentación d'un Manifiestu Republicanista, l'espardimientu de miles de copies peles cais d'Uviéu, una conferencia a cargu del miembru de la Direición Nacional d'Izquierda Asturiana y historiador Faustino Zapico nel Campus del Milán y la cuelga de pancartes reivindicatives pela redolada d'un Uviéu que fizo frente a la función de títeres que tolos años convierte a esta ciudá na capital cortesana del imperiu con motivu de los "Premios Príncipe".
mias>> solidarizóse coles Lleendes Urbanes na Estación d'autobuses d'Uviéu
31/10/2006 >> La emigración moza que carez Asturies y l’actitú despótica de los principales cargos políticos asturianos, encabezaos por Vicente Álvarez Areces, cola propia mocedá que carez d’esta situación, son los dos principales frentes d’esta campaña qu’organizó Mocedá d’Izquierda Asturiana, una agrupación de moces y mozos que trabayen dende postulaos nacionalistes, ecoloxistes
y d’esquierda y vinculada dafechu al partíu políticu Izquierda Asturiana (IAS).
Por ello, Mocedá d'Izquierda Asturiana tuvo presente na estación d'Autobuses d'Uviéu sofitando a les "lleendes urbanes" y espardiendo cientos de "Manuales de la Mocedá Emigrante d'Asturies".
12/10/2006>> Yá puedes topar na seición "na cai>>" de la nuesa web el númberu 11 "Especial Branu" tamañu din-A3 del cartafueyu d'información de Mocedá d'Izquierda Asturiana. Nesta edición recueyense temes como:
mias>> nel Derramidea
I Asamblea Nacional
Eita preséntase al mundu na web
mias>> nel Día de la Nación Asturiana
Énte los insultos d'Areces
Televisión asturiana antiasturiana
Lleendes urbanes: 19.000 p'alló del Negrón
Pola Paz n'Oriente Próximu
Númberu dos del Soyáu Alternativu
Campaña Antifacista
Neonazis: Non más agresiones
mias>> pola Cultura Forestal
Qué ye mias>>?
Calca equí pa descargalu, amás podras topar el na cai>> na so versión impresa na to facultá, institutu, biblioteca, y nos centros culturales de la to ciudá.
mias>> opúnxose al desfile de la Guardia Civil n’Asturies faciendo un llamáu al antimilitarismu y a la paz.
09/10/2006>> Durante vienres, sábadu y domingu, Mocedá d’Izquierda Asturiana entamó y desendolcó una campaña contra les eshibiciones militares en xeneral y contra’l desfile de la Guardia Civil n’Asturies en concreto. La campaña cuntó con dellos elementos que tuvieron como oxetivu la sensibilización de la población énte la esaltación bélica.
Esta campaña forma parte del qu’en Mocedá d’Izquierda Asturiana ta planiáu como mes de les lluches sociales, baxo’l lema “Ochobre: el meyor homenaxe, la llucha”. Un mes, esti ochobre de 2006, nel que n’alcordanza d’una revolución como la del 34, mias>> quier reivindicar aquellos valores de los que fai usu anguaño, los de la solidariedá y la revolución social, la llucha énte les imposiciones y el fascismu. Asina, durante les trés selmanes que vienen, la organización de mocedá va siguir sacando a la cai diferentes campañes coles que reivindicar un mundu y una Asturies meyores: con más xusticia social y más igualdá, onde s’apueste pola paz, onde les agresiones, les armes y les imposiciones nun seyan una constante na vida de les persones. Ye ésta, pa mias>>, la meyor manera de facer homenaxe a aquelles muyeres y homes que llucharon n’ochobre de 1934.
mias>> refuga la celebración de la Guardia Civil n’Asturies
05/10/2006>> Dende Mocedá d’Izquierda Asturiana faise un llamáu al pueblu asturianu a nun asistir nin presenciar los actos que con motivu de la celebración de la so patrona, la Guardia Civil prepara n’Asturies pa esta mesma selmana. La convocatoria a l’abstención respeuto a estes espresiones vien de la mano d’un deseyu de paz y antimilitarismu pal país asturianu. En boca del so portavoz nacional Carlos Suari “en mias>> recibimos esta anuncia sobre la celebración añal de la Guardia Civil equí n’Asturies con fonda preocupación énte lo qu’entendemos como unos actos innecesarios y propios d’otru tiempu”.
Continuando nesta llinia contestataria y reivindicativa, Mocedá d’Izquierda Asturiana va tar los próximos díes n’Uviéu llevando a la xente estes reflexones per aciu de material informativo diverso, mesmo que solicitando la total indiferencia de la ciudadanía uvieína y asturiana hacia estes expresiones d’esaltación del armamentismu que dende esta agrupación de moces y mozos de la izquierda alternativa y nacionalista, verde y ecoloxista, refugamos con toles nueses fuercies.
05/10/2006
![[cartel de la convocatoria]](imaxemias/antifapayares07.jpg){kind=link}
![[cartelu del conciertu]](/imaxemias/cartelumieresfinal.jpg){kind=link}
![[panfletu de mias>>]](/imaxemias/bablenesesqueles.jpg){kind=link}
![[segunda tira d'Eita>>]](eita/eita2.gif){kind=link}