mias>> sofita la II Fuelga pol Drechu a estudiar Llingua Asturiana de Xunta Moza

18/11/2006 >> La estaya moza, vinculada a Izquierda Asturiana, Mocedá d’Izquierda Asturiana (mias>>) quier espresar el so sofitu a la fuelga estudiantil convocada pola Xunta Moza pa esti miércoles 23 de payares.

La falta d’escolarización de l’asignatura de llingua asturiana en munchos de los centros d’enseñanza de secundaria y bachiller d’Asturies ye un atentáu escontra la llibertá d’eleición de los escolinos asturianos qu’incluso incumple la probetaya Llei d’Usu y Promoción de la Llingua asturiana.

mias>> considera que la situación actual de la enseñanza de la llingua asturiana nun garantiza los más mínimos drechos humanos y democráticos, de lo cual son culpables les organizaciones polítiques d’un gobiernu que reprime y marxina la llingua asturiana.

mias>> desixe a PSOE-IU-BpA que nel más breve espaciu de tiempu s’entame la redacción del Reglamentu, previstu na Llei d’Usu y Promoción, qu’ha espeyar un cambéu nel sistema educativu asturianu en tolo que cinca a la llaceriosa situación llingüística que carez Asturies anguaño

Mocedá d’Izquierda Asturiana va poner a disposición de la Xunta Moza tolos medios tanto humanos como materiales pa consiguir qu’esta movilización estudiantil seya un ésitu y que fuercie al gobiernu asturianu a cumplir la lleglidá vixente pa que s’igüen tolos problemes de la enseñanza de llingua asturiana.

Poro, el miércoles 23 de payares taremos presentes na manifestación convocada pola Xunta Moza pa lluchar polos drechos de les y los escolines y escolinos d’Asturies.

Escontra la inxusticia y la represión de drechos llingüísticos:
¡¡El miércoles: NUN ASISTAS A CLAS, FAE FUELGA!!

N’Asturies a 18 de Payares de 2005.
Xunta permanente de Mocedá d’Izquierda Asturiana.

contauta con nós

Mocedá d'Izquierda Asturiana 2006