mias>> escontra la relixón na enseñanza y los conciertos educativos

23/11/2005 El portavoz de mocedá d’izquierda asturiana (mias>>) pronunciose ayeri sobre l’anteproyeutu de llei pa reforma de la L(l)OE en términos perduros:

Según Carlos Suari Rodrigue,  “la reforma de la Llei Orgánica d’Educación tendría que sofitase en dos finxos básicos: una enseñanza pública, onde toes y toos tengamos los mesmos drechos y posibilidaes, y, per otru lláu, que seya dafechamente llaica y de calidá”.

Suari posicionose escontra’l gobiernu del estáu español y el primer partíu de la oposición por, según elli, “facer d’un debate tan importante como’l de la educación un espectáculu llaceriosu y una guerra eleutoral de votos”.

El portavoz de mias>> atacó, per un lláu, “l’estremismu col que, dende la ultraderecha española, se tan calteniendo postures indefendibles” -refiriéndose a la polémica colos conciertos y la docencia de relixón católica en centros d’enseñanza públicos- “nún estáu supuestamente aconfesional y que debiere ser llaicu”.

Pa les mocedaes d’izquierda asturiana “el gobiernu estatal debe suprimir los conciertos, ye dicir, les subvenciones con perres públiques de tolos ciudadanos, a los colexos privaos, centros nos que se prioricen los alumnos, de tal mou que conderguen a la enseñanza pública a ser la de los desfavorecíos”, términu, esti caberu, emplegáu por cares visibles del PP recientemente n’Asturies. Amás, pa Suari “ye irónico que, precisamente, los profesionales meyor preparaos seyan despreciaos frente a los de los centros privaos”. Respeuto a la supuesta "llibertá d'eleición de centru" pola que glayen los defensores de la relixón y los conciertos, Suari afitó que "son precisamente les empreses privaes, tornáes en centros d'enseñu, les qu'escueyen l'alumnáu que-yos resulta rentable en términos económicos, académicos y d'imaxe".

“Puntu aparte merez el tema de la relixón” que según el portavoz de mias>> espeya “la inoperancia de la constitución española, onde se afiten coses que lluéu, día a día, vemos que nun se cumplen”, en clara referencia a la supuesta aconfesionalidá qu’afita la constitución estatal.

Pa Carlos Suari “la relixón nun puede tener cabida na enseñanza pública nún estáu aconfesional, obligando a los escolinos a decantase y/o afitar les sos postures personales y muncho menos que seya computable nos espedientes, cosa qu’enxamás foi” porque, amás,  “yá hai otres víes que difunden y estudien les relixones, un tema esclusivamente del ámbetu privau, que nun puede condicionar de nenguna manera’l sistema educativu d’un estáu”. Amás denunció la hipocresía de los defensores de la relixón católica na escuela, que “ñegaríen la entrada d’otres relixones como l’islam” nos centros d’enseñanza.

Per otru lláu, el portavoz de mias>> recordó que “foi’l gobiernu del PSOE el qu’afitó’l monstruu de los conciertos, amosando una gran irresponsabilidá qu’agora échase-y enriba, cuando pretende llavase les manes con una reforma continuísta que caltién lo que yá había”.
Suari sorrayó que’l gobiernu del PSOE “nun pon xeitu nin ganes porque nun tien enfotu políticu nengún de sofitar como debiere a la enseñanza pública, porque amás ésta ye una llei idéntica a la del PP, con retoques de suavidá, que privatiza'l drechu universal a l'enseñu, que caltién la relixón na escuela y que precariza, inda más, el sistema educativu, quiciabis col envís de ferilu y desfarrapalu a un tiempu".

Por too ello, el portavoz de mias>> desixó al gobiernu estatal una “braera reforma del sistema educativu, frente a esta L(l)OE que dé igualdá d’oportunidaes a toles families y que nun transixa coles desixencies del estamentu clerical más ranciu y atrasáu”.

Direición Nacional de Mocedá d'izquierda asturiana

(mias>>)

29 de payares de 2005

contauta con nós

Mocedá d'Izquierda Asturiana 2006