 |
Carlos Suari Rodrigue
portavoz de Mocedá d’Izquierda Asturiana (MIAS)
El tiempu de la mocedá
Asturies patria querida / Asturies patria
sin sol
Stoned Atmosphere
Nun quiero más pasáu
faraguya / nin más futuru a plazos
Boni Pérez
Asturies
2005
Asturies 2005 ye un llugar y un tiempu analizable. Un país
con poco más d’un millón d’habitantes
que pierde mocedá a un ritmu que respinga, magar que
delles persones tenten de tapecelo. Miles de mozos y moces
que marchen por necesidá, a la busca d’un futuru
más o menos verdadero. Un futuru qu’anguaño
Asturies y los sos gobernantes nun saben o nun quieren ufiertanos.
Amás de la falta d’emplegu y la precariedá
del qu’existe, l’ausencia de garantíes
sociales pa la xuventú vien a ser una ponte de plata
que mos empobina ensin remediu a la emigración obligada.
Too ello nun marcu socio-políticu al que-y afayamos
tremendos problemes y torgues pal desenvolvimientu de les
nueves xeneraciones: la hipocresía social y alministrativa,
la indiferencia social inducida por ello, la falta d’alternatives
y anovación política, el recule o allancamientu
nes llibertaes, el centralismu y el clientelismu, la inesistencia
d’autogobiernu, l’agresividá col mediuambiente,
l’ausencia de conceptu identitariu propiu, la reducción
soterrada de les competencies xuveniles, la incapacidá
d’iguar les nueves problemátiques sociales, el
desprestixu institucional hacia lo propio, la inxusticia social,
el belicismu, la desigualdá, la insolidariedá...
La
mocedá güei
Si daquién ta salvando los muebles d’un movimientu
como l’asturianista a lo menos, na so parte de vindicación
cultural (sobremanera llingüística), ye la mocedá,
que d’una manera sorprendente (polo complicao de les
coses nesti llugar y nesti tiempu) xurde con enerxía
n’organizaciones socioculturales d’acción,
y nun permitiendo que la estratexa gubernamental descarada
de facer menguar la tensión d’esa cuerda pela
que puxamos delles persones, trunfe. Trátase d’una
porción mínima de mocedá respective al
total de xente xoven que vive en o ye d’esti país,
de la que la mayoría mira (a naide con un pelín
de capacidá [auto]crítica habría choca-y)
pa otres coses bien alloñaes d’esti ámbitu.
Lo que ta claro ye que nin la supuesta intelectualidá
reconocío del ghetto asturianista (la qu’agora
ye afín a esti gobiernu) nin la propia institución
son a facer un res pol padremuñu cultural qu’identifica
a esti país nin pola mocedá que vien col derechu
incontestable de podelu conocer, unos callando como afogaos
–daquién sabrá a cambiu de qué-
y otros gociando d’esi apoyu que va pocos años
nun podríen nin suañar y qu’agora se materializa
gracies a determinaos exercicios de funambulismu na cuerda
electoral y del poder d’unos, d’otros y de lo
de más alló.
El
relevu
Dase por sentao que les xeneraciones que venimos detrás
hemos garrar un supuestu relevu y siguir de frente per nun
sé qué camín. De dalgún mou, esti
tipu de conductes de los que tán de vieyo nestos movimientos,
suponen una validación propia de lo que faen, cuando
la realidá amuesa caldía que los resultaos difícilmente
podíen ser peores. La falta d’autocrítica
dientro del nacionalismu cultural y políticu d’Asturies
vuelve, de nueves, a xenerar un mundu paralelu (agora, en
parte, cerca d’Areces y compañía) que
s’autocomplaz y nun recibe’l mensaxe claru qu’emite
la xente nuevo. Si a esto amestámos-y l’acción
mentirosa d’un equipu de gobiernu de la supuesta izquierda
plural (chapa y pintura) con simpatíes asturianistes
(más chapa y más pintura) dedicáu dafechu
a vender fumu, yá tenemos la fame y les ganes de comer
nel mesmu paquete. La mocedá que participa nestos movimientos
quier el cambiu, nun hai esquemes que continuar, hai coses
por construir dende cero.
Milenta
lleendes, cada domingu, na estación
(O’l drama tapecíu de la emigración forciada).
Les estaciones d’autobuses d’Uviéu o Xixón
un domingu a media tarde son la imaxe d’una firida sangrante
pa la que l’alministración nun sólo nun
tien igua, la hemorraxa ñégase y toos tan panchos.
Pero ye qu’amás de lo qu’implica directamente
esta situación, decatarémonos del efectu desmoralizante
que tien pa los que queden cada selmana diciendo adiós
al hermanu, a la moza o a l’amiga dende l’andén.
Una mocedá educao na necesidá cuasi obligatoria
de colar pa buscar unes esperances mínimes de supervivencia
ye una xeneración marcada pol signu del peaxe, los
alses, y lo que ye peor, la idea clara de qu’esta tierra
nun ye a danos lo que daveres ye preciso pa desendolcar una
vida normal.
Y
equí tamos
Pesie al ermu gubernamental al que nos tamos avezando dende
cuantayá, lo mesmo en materia cultural-identitaria
qu’en cuestiones sociales nes que s’inxer, lóxicamente,
la política de mocedá, una minoría absoluta
de xóvenes entá quier averase, participar o
incluso tresformar esti paisaxe murniu que nos contestualiza.
Especialmente decepcionante ye lo que ta ufriendo’l
gobiernu actual depués d’asumir una riestra de
compromisos nes materies mentaes, y qu’a media lexislatura
tienen más corte de ciencia ficción que d’otro,
con un PSOE estáticu nel so papel y una IU que llucha
por nun desapaecer definitivamente, utilizando estratexes
(convenientemente variables en función del puntu del
Estáu del que se trate) que nel nuesu casu, l’asturianu,
pasen pela utilización de sectores nacionalistes, qu’anque
minoritarios al estremu, sirvieron pa proyectar unes ilusiones
sociales y asturianistes mínimes que, a les clares,
nun son nin sedrán a materializar (sacantes caxigalines),
tapeciendo esti fracasu nuna escena ridícula na que
se presenten supuestes redes, observatorios, campañes
(les imprentes deben tar encantaes) improductibles, cosmétiques
y que siempre protagonicen los mesmos actores, les mesmes
actrices, davezu sparrings, paez ser, dispuestos a caltenese
nel sitiu por mui altu que seya’l preciu que tenga que
pagar Asturies, y anque d’esta manera tean sofitando
a aquelles persones y formes d’estrociar qu’un
día fueren motivu de les sos crítiques más
dures.
Magar
d’esto, esos pocos mozos y moces que col enfotu puestu
nel futuru d’esti país deciden participar en
dalgún de los movimientos que los acueyen, planten
cara a la situación, quiciabes aguardando un cambiu
d’actitú y plantegamientos de los que determinen
(conscientes o non) el porvenir de la nuesa tierra, trabayando
por llevantar lo que pue ser l’entamu d’una forma
nueva d’entender Asturies o a lo menos una visión
muncho más digna, llimpia y comprometida col nuesu
futuru colectivo que la que dexen de retirada los que yá
(poniéndose nel casu más xustificable) fartos
de militar, pasen directamente al comederu o la diáspora
ensin pontes intermedies. Xente mozo, qu’anque bien
estremao, comparte unes nociones clares de lo que somos y
lo qu’habríemos ser.
En
fin…
Ye por ello qu’en movimientos como al que pertenezo
(Mocedá d’Izquierda Asturiana) pescanciamos qu’agora
más que nunca ye’l tiempu de la mocedá,
de garrar la pallabra y proponer ensin mieu un proyectu concretu,
cenciellu y real que seya a dar alternativa a les dinámiques
negatives qu’erosionen de contino’l país,
configurando adulces un vacíu pa les xeneraciones venideres.
Necesitamos un proyectu qu’ha materializase en propuestes
plantegaes en mui diferentes estayes que ñazan col
envís de facer política mozo, política
verdá; col únicu oxetivu de que les coses entamen
a cambiar nesti país. Y delles persones sabemos que
van cambiar, qu’a poco que podamos vamos cambiales.
Y abondo.
*
esti artículu foi publicáu pol selmanariu Les
Noticies el 8 de mayu de 2005
NOTA: Dalgunes llinies pertenecen
al testu 21
propuestes pa una mocedá del sieglu XXI.
|
 |
