Mocedá d’Izquierda Asturiana celebra un añu del so cartafueyu na cai>>

Aprovechando l’aniversariu, llanza la coleición de documentos de llinia política, El Soyáu Alternativu

11/05/2006 >> Nesti mes de mayu, y coincidiendo col númberu 9 de la publicación na cai>>, cúmplese xusto un añu desque entamare la publicación d’esti cartafueyu nel que Mocedá d’Izquierda Asturiana recueye tolos temes d’actualidá, asina como idees, propuestes, convocatories, actividaes, resúmenes de comunicaos y otres informaciones del interés de la mocedá.

A lo llargo d’estos meses d’actividá editorial, Mocedá d’Izquierda Asturiana espeyó nes llinies del na cai>> una parte de la so actividá, y con ello los importantes avances que vien dando l’agrupación, ensin perder por ello la humildá cola que trabayamos nin les ganes de que más xente pase yá a formar parte del nuesu proyectu políticu pa la mocedá d’Asturies.

na cai>> va siguir siendo’l mediu físicu de comunicación principal de mias>>, procurando meyorar la calidá de la publicación y aumentando les tiraes. Durante estos primeros nueve númberos salieron a la cai 18.000 copies que se pudieron alcontrar en cafeteríes, chigres, centros de cultura, institutos, facultaes, o que la mesma militancia de mias>> entregó en mano nos actos en que participó. Toles ediciones de na cai>> tan tamién na web de la organización www.ias.as/mias, pal so llibre espardimientu.

Celebrando esti aniversariu, naz una nueva iniciativa de Mocedá d’Izquierda Asturiana col oxetivu fundamental de xenerar una llinia de discursu políticu clara y capaz a llegar a les moces y los mozos d’Asturies, convidando a que participen activamente nel nuesu proyectu.

El Soyáu Alternativu va entamar con un primer testu que va recoyer la reflexón interna de mias>> alrodiu de los conceptos d’indepencia y l’autodetermín. Con él, según Xuacu Rodríguez, encargáu de Comunicación y Nueves Tecnoloxíes de mias>>, “pretendemos asoleyar una desplicación nueva d’estos conceptos añediéndo-y al componente identitariu’l que realmente val na xera de facer política, l’utilitariu. La xente mozo que formamos mias>> queremos da-y protagonismu a esta idea polo que tien de ferramienta nel trabayu de tresformación social y política pola que naguamos, como preséu na llucha por algamar una Asturies más socialmente xusta, ecolóxica y responsable cola so cultura. Una Asturies que se presente al mundu con espíritu solidariu y abiertu ensin escaecer lo que ye y les sos necesidaes”.

Estaya de Comunicación y Nueves Tecnoloxíes de mias>>
Uviéu, 11 de mayu de 2006.

contauta con nós

Mocedá d'Izquierda Asturiana 2006