Mocedá d’Izquierda Asturiana refuga
dafechu la tauromaquia

Énte les próximes xornaes de tauromaquia n’Asturies, l’agrupación de mocedá nacionalista llamenta l’apoyu
que les alministraciones dan a estos actos

15/05/2006 >> Mocedá d’Izquierda Asturiana (mias>>) quier amosar el so esmolecimientu énte les próximes xornaes de tauromaquia que se van dar nel nuesu país. Entamando per L’Ascensión n’Uviéu, pero siguiendo con otres cites que de xuru van tener llugar n’Asturies a lo llargo’l branu, les denominaes “corríes de toros” van apaecer, tristemente, de nueves, tamién en territoriu asturianu.

La perconocida violencia que conlleven estos actos, nos que xabaz y gratuitamente s’asesinen a decenes d’animales pa dar col gustu a un públicu aficionáu inconsciente de lo que supón que dende estes llatitúes del mundu, supuestamente avanzáu, siga emitiéndose esa imaxe de crueldá y absurdo, saca de caúna y caún de nós la vergoña ayeno más fondo. Nes llargues tardes nes que se desendolquen estos actos, la muerte, la humildación y el dolor, son les característiques d’un actu que resulta amplificáu pol siguimientu que d’ello faen los medios de comunicación y pol sofitu qu’ufren les alministraciones lexislativa, económica y loxísticamente.

D’otra, mias>> denuncia con preocupación la rara obsesión de dalgunos políticos del nuesu país, que como Gabino de Lorenzo, siguen enfotaos n’inxerir la tauromaquia yá non sólo nos programes lúdicos de ciudaes tan importantes como Uviéu, sinón na vida cotidiano d’Asturies, cosa qu’en Mocedá d’Izquierda Asturiana tampoco nun se va tolerar, atalantando que la importación a la nuesa cultura d’una actividá tan llamentable, sangrina y refugable dende munches perspectives, nun arriquez la cultura propio d’esti país, tolo contrario, constitúi l’intentu de dignificación d’un elementu alóctonu, yá de per se indignu y dañible.

Como solución a la refuga de la finalidá orixinaria de les places de toros, Mocedá d’Izquierda Asturiana propón una tresformación integral y sostenible col ambiente urbanu, faciendo un apueste esclusivu polos usos culturales de calter públicu siempre que s’eliminen dafechu los elementos que más directamente recuerden la práctica brutal pa la que s’entendieron tales instalaciones nun principiu, esto ye, un reciclaxe urbanu y arquitectónicu hacia un usu social más xustu y deseyable, basáu en manifestaciones culturales públiques alternatives, educatives y lúdiques.

Llamando a la oposición énte la tauromaquia, mias>> anuncia que va tar na cai llevando la so voz y reflexón sobre estos actos y animando a que tola mocedá asturiano seya a movilizase, dexando bien a les clares que nin n’Asturies nin nenyures queremos estes práctiques. Nesi sen, Mocedá d’Izquierda Asturiana va repartir carteles alusivos y va participar nos actos que refugando esta realidá condenable yá tán entamando a organizase.

Xunta Permanente de Mocedá d’Izquierda Asturiana.
Uviéu, a 15 de mayu de 2006.

contauta con nós

Mocedá d'Izquierda Asturiana 2006