Mocedá d’Izquierda Asturiana llama a siguir na llucha nel 17 de mayu
L’agrupación de mocedá recuerda qu’entá queda muncho trabayu pa la consecución d’una igualdá total
16/05/2006 >> La nuesa organización, Mocedá d’Izquierda Asturiana, quier sumase a la vindicación d'esti día faciendo un llamáu a la participación nes actividaes de llucha y reflexón programaes pa la xornada y amosando, como dende’l nuesu entamu, que la consecución de los derechos, y poro, la xusticia pal colectivu GLTB, ye pa nós un finxu fundamental. MIAS fai una llectura propia sobre l’estáu de la cuestión:
AFONDAMOS na necesidá de continuar nuna posición crítica dende les organizaciones sociales y polítiques énte la falta d'avances reales n'igualdá y derechos de gais, llesbianes, bisexuales y transexuales magar que celebremos los pasos daos (anque tovía insuficientes) en materia lexislativa.
ASITIAMOS a la nuesa organización, mias>>, ente les voces que siempre pidieron pola llegalización dafechu de los matrimonios homosexuales y pola capacidá d'adopción d'éstos no que consideramos una superación del marcu antiguu de llibertaes y una equiparación de derechos respective a les pareyes heterosexuales. Por embargu, consideramos que ye preciso siguir conquistando derechos y ferramientes que puedan garantizar l’algame d’una igualdá real d’oportunidaes ente toles persones, un marcu de derechos individuales y colectivos dafechu desenrolláu.
AFALAMOS a la clas política a baltar l'actual situación d'inxusticia social y desigualdá, trabayando por consiguir una llegalidá internacional que permita’l llibre desenrollu vital de toles persones en cualesquier territoriu del planeta, ensin tener qu’esconder los deseyos de vivir en llibertá en función del suelu que se pisa.
LLUCHAMOS contra la homofobia y la tresfobia que, tristemente, instituciones como la ilesia católica y los sectores políticos y sociales más arcaicos y arcaizantes tresmiten. Nesa llinia, mias>> va siguir trabayando y semando la grana de la educación social, sexual y afectiva ente lo más mozo de la nuesa sociedá, el nuesu ámbitu preferente, cola fin de poder sumar esfuerzos con otros colectivos na xera de formar persones que quieran la xusticia y que tengan la capacidá de reflexonar y de tomar determinos más alló de lo que dicten los elementos más reaccionarios.
SOFITAMOS a les asociaciones que dientro y fuera d’esti país vienen trabayando con munchu esfuerzu pa dir, pasu ente pasu, ganando estayes de xusticia y llibertá pal colectivu gai, lésbicu, transexual y bisexual, y aprovechamos la ocasión pa felicitalos nel lentu pero firme algame de lexislación que permita sentar les bases d’un futuru de dignidá y derechos pa toles persones.
Una Asturies sexualmente llibre, xusta ya igualitaria ye posible, y en Mocedá d’Izquierda Asturiana sabémoslo.
Xunta Permanente de Mocedá d’Izquierda Asturiana.
Uviéu, a 16 de mayu de 2006.
contauta con nós
Mocedá d'Izquierda Asturiana 2006 |
