mias>> desixe la implantación de
llinies de tresporte pela nueche

Les tres ciudaes mayores del país queden dafechu incomunicaes hasta 9 hores, otros llugares, inda más

25/05/2006 >> Mocedá d’Izquierda Asturiana desixe la implantación de llinies de tresporte que comuniquen, a lo menos, los principales centros de población del país, tamién pela nueche. Mesmo RENFE qu’ALSA suspenden los sos servicios n’ocasiones en más d’ocho hores. Ye por exemplu’l casu de la comunicación ente Uviéu y Avilés, que queda interrumpida más de siete hores nos dos sentíos durante la selmana y hasta nueve en fines de selmana y díes festivos.

Otramanera, llugares de menor población fuera del triángulu Xixón-Avilés-Uviéu, queden incomunicaos durante munches más hores amás de tener durante’l día menor frecuencia de serviciu. Según Carlos Suari, portavoz nacional de Mocedá d’Izquierda Asturiana “esta llaguna nel serviciu de tresporte público nun ye propia d’un país cola densidá poblacional del nuesu, y menos, d’una rede de ciudaes y localidaes tan próximes ente les que se produz un continuu intercambiu de población”, añediendo que “por exemplu, Siero, Uviéu, Xixón, Mieres y Llangréu son conceyos llinderos con núcleos mui habitaos que nun pueden quedar hasta 9 hores incomunicaos ente ellos, hai que desixir que se garanticen unes mínimes conexones pela nueche, yá seya pa quien tenga que se mover por motivu llaboral, de fuercia mayor o por puru ociu, tamos falando de derechos”.

mias>> quier facer públicu’l so descontentu con RENFE, ALSA, FEVE y les alministraciones locales y asturianes, solicitándo-yos  que quiten esta torga que reduz escesivamente la movilidá ente ciudaes yá seya cuando’l trabayu o les obligaciones lo precisen o cuando nos momentos d’ociu, la xente, davezu, la mocedá, quier desplazase.

Errores de plantegamientu como esti siguen demostrando qu’entá hai mui bien de materies pendientes nel ámbitu de les comunicaciones n’Asturies, asuntu nel que’l gobiernu asturianu había tar actuando yá.

Una posible solución ye la inclusión nos horarios de los principales medios de comunicación del país d’un par de conexones nocturnes a lo llargo la nueche en dambos sentíos y ente, como poco, los conceyos de la rexón central del país, los más habitaos y que son los que faen d’enganche con otres fasteres d’Asturies.

Estaya de Comunicación y Nueves Tecnoloxíes de mias>>

Uviéu, 25 de mayu de 2006

contauta con nós

Mocedá d'Izquierda Asturiana 2006