mias>> na concentración antitaurina

29/05/2006 >> Mocedá d'Izquierda Asturiana tuvo presente na concentración convocada pola asociación en defensa de los animales ANADEL (con quien entamemos una rellación d'amistanza qu'aguardamos dea frutos nesta llucha), el domingu 28 na plaza toros d'Uviéu.

Xunta otros asistentes, la xente de mias>> glayó lemes como "D'Uviéu a Sevilla nin una banderilla" o "Tolos toreros son unos carniceros". La nuesa presencia nesta convocatoria enmárcase na campaña que yá entamemos escontra la tauromaquia n'Asturies va unes selmanes col aniciu de la pegada carteles refugando esta práctica violenta y xabaz.

Denunciamos con preocupación la rara obsesión de dalgunos políticos del nuesu país, que como Gabino de Lorenzo, siguen enfotaos n’inxerir la tauromaquia yá non sólo nos programes lúdicos de ciudaes tan importantes como Uviéu, sinón na vida cotidiano d’Asturies, cosa qu’en Mocedá d’Izquierda Asturiana tampoco nun se va tolerar, atalantando que la importación a la nuesa cultura d’una actividá tan llamentable, sangrina y refugable dende munches perspectives, nun arriquez la cultura propio d’esti país, tolo contrario, constitúi l’intentu de dignificación d’un elementu alóctonu, yá de per se indignu y dañible.

Llamando a la oposición énte la tauromaquia, mias>> anuncia que va tar na cai llevando la so voz y reflexón sobre estos actos y animando a que tola mocedá asturiano seya a movilizase escontra esta xabaz y sangrienta práctica.

Nin Asturies, nin nenyures.

¡Valió de tauromaquia!

contauta con nós

Mocedá d'Izquierda Asturiana 2006