mias>> denuncia la precariedá llaboral
La formación xuvenil nacionalista sorraya que ye la mocedá quien más ta careciendo de les consecuencies d’un mercáu llaboral inestable, inseguru y esplotador
30/05/2006 >> Pasada yá mui bien la metada de la llexislatura del gobiernu asturianu actual, dende Mocedá d’Izquierda Asturiana (mias>>) queremos denunciar la inesistencia de polítiques actives destinaes a xenerar emplegu mozo de calidá aceptable n’Asturies.
Les moces y los mozos de la nuesa formación nacionalista y d’izquierda consideramos que’l gobiernu constituyíu por PSOE y IU-BA ta siendo difícilmente empeorable pa los intereses de la mocedá asturiano, dexándonos la emigración como única salida, y provocando que la xeneración más formada de la historia d’Asturies tenga de colar pa buscar un futuru dignu.
Valoramos mui negativamente’l balance del gobiernu de Vicente Álvarez Areces en materia d’emplegu mozo dao que “col gobiernu de la supuesta izquierda plural a la mocedá nun se nos tan dando mayores alternatives que con otros anteriores, el de la mayoría del PSOE, o’l del lliberalista Sergio Marqués” según apuntó’l responsable de Polítiques de Desendolcu de Mocedá d’Izquierda Asturiana, l’economista, Carlos Fernández Fuente.
“Un tiempu perdíu pal emplegu” ye’l resume que fai mias>> de la política d’esti gobiernu de coalición, apaeciendo la precariedá llaboral como una constante en tolos estudios sociales de calter empíricu que sobre’l tema se tán faciendo. “L’emplegu femenino y l’emplegu mozo son lo más perxudicao pola política d’Areces, fecha d’espalda a les problemátiques sociales reales de l’Asturies d’anguaño”, comentó’l responsable de la Estaya, Carlos Fernández Fuente.
Amás, mias>> vuelve denunciar l’altísimu índiz d’esplotación, inestabilidá ya inseguridá llaboral de los pocos mozos y menos moces que fueron a topar trabayu dientro del nuesu país. Paeznos inalmisible que ser muyer o moza/u siga valiendo pa tener un réxime salarial inferior, o que la poca ufierta llaboral n’Asturies quede resumida n’emplegos temporales ensin opción a una vida llaboral digno.
D’otra y pa rematar, Mocedá d’Izquierda Asturiana quier facer un llamáu a la mocedá d’Asturies a nun almitir nin una sola falta más de respetu en cuantes al dolorosu tema de la emigración, nin aceptar puestos de trabayu qu’atenten frontalmente colos derechos humanos más básicos, afalando a la denuncia, la movilización, la llucha.
Estaya de Polítiques de Desendolcu de mias>>
Uviéu, 30 de mayu de 2006.
contauta con nós
Mocedá d'Izquierda Asturiana 2006 |
