26/06/2006 >> Dientro de los actos programaos pola plataforma contra la reforma llaboral na que Mocedá d'Izquierda Asturiana participa, la manifestación del pasáu 20 de xunu, foi ensin dulda’l más importante. Nella, les organizaciones convocantes percorrieron les cais de Xixón amosando a les clares la oposición de la izquierda asturiana énte lo que entendemos como una reforma llaboral del beneficiu pa cuatro.
mias>> esmolezse sobremanera pol papel que-y asigna a la mocedá esta reforma que facilita la precariedá al traviés d’un menor control de la calidá de los puestos de trabayu, un mecanismu de despidu más rápidu y cenciellu pal empresariáu y una ausencia absoluta d’estratexes series empobinaes a xenerar primeros emplegos mozos.
Tamién pareznos especialmente cafiante la forma na que xurde esta reforma llaboral, negociada dando-y el llombu a la sociedá, amagostada de manera que fixere’l menor ruiu posible, y pa mayor despropósitu, vendida como si gociara d’un carácter social y xustu, nun exerciciu de perfecta hipocresía tanto del PSOE y acólitos como de les cúpules de los sindicatos mayoritarios.
Igual que nel 20 X, mias>> va siguir tando presente nel llabor reivindicativu contra esta reforma llaboral y contra les regles que rixen anguaño’l mercáu llaboral y qu’atalantamos como dañibles en xeneral y especialmente xabaces colos sectores de la sociedá que más problemes atopen p’algamar un trabayu dignu: les persones con necesidaes especiales (sociales, psicolóxiques, físiques), les muyeres y la moceda.
