mias>> reaiciona énte un nuevu insultu del presidente Areces a la mocedá asturiano

Suari desixe a Areces "menos insultos y mentires y mas fechos y propuestes series"

Los glayíos de protesta siéntense bien alto dende Mocedá d’Izquierda Asturiana, énte les últimes declaraciones del presidente Vicente Álvarez Areces onde afita que “la mocedá d’Asturies emigra porque la so cualificación ye meyor a les d’otres comunidaes autónomes”.

Según el portavoz nacional de Mocedá d’Izquierda Asturiana, Carlos Suari Rodrigue, “esti fechu constitúi, una vegada más, un insultu per parte del presidente asturianu, que tornó a desmentir l’éxodu de miles de moces y mozos asturianes y asturianos cada añu a la gueta d’un trabayu dignu.”

Pa Suari “esti gobiernu de la esquierda plural non solo nun foi quién a desendolcar midíes afayadices pa evitar la emigración forciada de la mocedá sinon que tracamundia datos pa xustificase y engañar a la sociedá asturiana” fechu que’l portavoz de mias>> topa “gravísimu” anque afita que “nun son a engañar a naide, porque toes y toos conocemos bayura de casos de mocedá titulao que nun ye a topar un emplegu acordies cola so capacitación nesti País”.

Nesti sen, Carlos Suari quixo apuntar que “les declaraciones una tres d’otra del presidente Areces nun fain más qu’aumentar la indignación y l’enfadu de les families asturianes que ven colar a les sos fíes y fíos acullá de les nueses llendes”.

Pa finar, Carlos Suari Rodrigue demandó “una política seria d’emplegu onde s’igüe la problemática de la emigración de la mocedá asturiano, ún de tantos fechos sangrinos que tamos padeciendo con estos malgobernantes”, polo que desixó “menos insultos y mentires y más fechos y propuestes series” pa rematar con un “¡Yá ta bien d’agresiones, Sr. Areces!”

¡COLA IZQUIERDA PLURAL EMIGRAMOS IGUAL!

Estaya de Comunicación y Nueves Tecnoloxíes de mias>>
Uviéu, 20 de Xunetu de 2006

contauta con nós

Mocedá d'Izquierda Asturiana 2006