mias>> celebró la so I Asamblea Xeneral

La llinia ideolóxica y estratéxica quedó afitada tres d’un añu consideráu fundacional pa la organización

07/08/2006 >> Esti sábadu 29 de xunetu celebróse n’Uviéu la I Asamblea Xeneral de Mocedá d’Izquierda Asturiana depués d’un cursu políticu d’alta actividá que la propia organización considera fundacional dao que se vivieron una riestra de cambeos de calter cualitativu y cuantitativu que provocaron la creación de mias>> como organismu estremáu alministrativamente d’IAS anque venceyáu a esti dafechu ideolóxica y estratéxicamente.

Na Asamblea Xeneral, presentáronse ponencies sobre los temes más importantes de la política que Mocedá d’Izquierda Asturiana vien desendolcando. Aprobáronse una definición y unos oxetivos xenerales de la propia organización, y lleóse una ponencia ideolóxica que va ser debatida internamente nes próximes selmanes col envís d’aprobala y publicala en breve. Nella queden espeyaos tolos ámbitos de trabayu políticu de mias>>: la mocedá d’Asturies, l’ecoloxismu, l’asturianismu, el nacionalismu d’izquierda, el republicanismu, los derechos humanos, la solidariedá y los desequilibrios sociales, la cooperación internacional, la globalización, la soberanía y l’autodetermín, la rellación d’Asturies col estáu español, la rellación d’Asturies cola Unión Europea, el pacifismu, la política llingüística, la cultura, la vivienda, el trabayu, la sexualidá, l’ociu, les polítiques d’igualdá, la participación y l’asociacionismu xuvenil. Otramanera, plantiyóse una ponencia estratéxica qu’afonda nes ferramientes coles que mias>> va executar el so trabayu nos próximos meses.

Tamién hebo espaciu pa les propuestes preelectorales de mocedá que se proyectaron yá a mou de preprograma electoral de mocedá en plenu debate y redaición yá de cara a recoyer nél les reivindicaciones –yá en forma práctica- de la organización nacionalista de mocedá.

Otramiente, quedó configuráu l’órganu de representación de mias>>, la Dirección Nacional, que cunta con un portavoz nacional y dos redes, una técnica y otra política.  El portavoz nacional ye Carlos Suari Rodrigue, de 23 años, escritor y estudiante de Ciencies de l’Actividá Física y del Deporte y d’Antropoloxía Social y Cultural. Na rede técnica alcontramos como Secretariu de Comunicación y Nueves Tecnoloxíes a Xuacu Rodríguez Morón, de 22 años y cocineru y estudiante de Ciencies Polítiques, como Secretaria de Finances a Almudena Suárez Flórez, de 16 años y estudiante de Bachilleratu, como Secretariu d’Organización y Rellaciones a Iyán González Castro, de 21 años y estudiante de Xeoloxía. Na rede política ta como Secretaria d’Igualdá y Xusticia Social, Clara Díez Márquez, de 17 años y estudiante de Bachilleratu, como Secretariu de Desendolcu Socioeconómicu a Carlos Fernández Fuente, de 27 años, llicenciáu n’Económiques y trabayador nuna aseguradora, como Secretaria d’Ecoloxía a Paula Fernández Montes, de 20 años y estudiante de Filoloxía Inglesa y como Secretariu d’Enseñu y Cultura a Xandru Blanco Huergo, de 18 años y estudiante de Filoloxía Clásica.

N’Uviéu a 7 d’agostu de 2006
Estaya de Comunicación y Nueves Tecnoloxíes
Mocedá d’Izquierda Asturiana

contauta con nós

Mocedá d'Izquierda Asturiana 2006