mias>> contra una televisión antiasturiana y ensin espaciu pa la mocedá
Pide la dimisión de Pérez Ornia énte la denuncia de que nel programa infantil Presta Asgaya tan tornándose cuentos fechos n’asturianu al castellán “pa evitar la presencia de la llingua nel énte”
10/08/2006 >> La estaya de mocedá del partíu Izquierda Asturiana quier denunciar les carencies del modelu de televisión pública asturiana que ta xestándose dende’l gobiernu del PSOE y los sos socios de llexislatura IU-BA.
Pal responsable de Comunicación y Nueves Tecnoloxíes de mias>>, Xuacu Rodríguez, “esta televisión que debiere ser la de toles asturianes y asturianos carez totalmente d’un modelu propiu pa ufrir programación afayadiza y de calidá a la mocedá asturiano”. Amás, aprovechó pa reiterar “l’insultu a los habitantes d’esti País que costitúi la nula presencia de la llingua asturiana nunes emisiones que, en cualquier otru llugar del Estáu con llingua propia, emplegaríen ensin problema y como ferramienta de normalización social”
Asina, pal voceru de Mocedá d’Izquierda Asturiana, “la inesistente presencia na TPA d’una programación afechisca pa l’audiencia xuvenil dexando de lláu, como creyemos y tamos viendo, la presencia nella de conteníos qu’espardan y promuevan valores como la solidariedá, la xusticia social, la ecoloxía o l’asociacionismu mozu ye una amuesa más de la dexadez qu’esti gobiernu de la esquierda plural tien pa coles polítiques en materia de mocedá, amás de la vergoña ayena que nos produz decatanos del sentimientu antiasturianu de los sos dirixentes, que veten la entrada de la llingua propia d’Asturies”.
Nesti sen, Xuacu Rodríguez quixo denunciar enérxicamente “el nuesu mayor despreciu énte aiciones como la traducción nel programa Presta Asgaya de cuentos pensáos y escritos n’asturianu, con temática mitolóxica, que tan espardiéndose a les neñes y neños asturianos en castellán”. El portavoz de Comunicación y Nueves Tecnoloxíes entrúgase “si ye l’aculturización, la torna de cuentos fechos por escritores asturianos como Miguel Solís Santos al castellán y la censura llingüística, la manera d’espeyar esi Reflexu de Nós que propugnaba la publicidá de la TPA dellos meses atrás".
Asina, dende la formación de mocedá nacionalista pidióse “la inminente dimisión” del dirixente del énte radiotelevisivu asturianu, Pérez Ornia, pola agresión “intolerable y constante de la TPA a tolo que tenga que ver cola nuesa llingua y cultura”.
Uviéu, a 10 d’agostu de 2006
Estaya de Comunicación y Nueves Tecnoloxíes
Mocedá d’Izquierda Asturiana
contauta con nós
Mocedá d'Izquierda Asturiana 2006 |
