mias>> acusa a Vicente Alvarez Areces de ser el máximu responsable políticu na salida de más de 19.000 moces y mozos d'Asturies

La estaya de mocedá de la formación política Izquierda Asturiana (IAS) critiquen la falta de compromisu real col emplegu mozu per parte del gobiernu asturianu y denuncien que la fracasada política d'Álvarez Areces namás xenera más lleendes urbanes.

23/08/2006 >> La organización moza del partíu políticu Izquierda Asturiana (IAS) considera que la salida de más de 19.000 moces y mozos d'Asturies a la gueta d'un trabayu nel añu 2005, según l'informe del observatoriu ocupacional del INEM, ye un capítulu más nes "nefastes y llacerioses polítiques de vien desendolcando l'autodenomáu gobiernu de  la esquierda plural" n'Asturies. Pa Carlos Suari Rodrigue, portavoz de la organización "otra vuelta los fechos dexen a les clares les campañes de fumo qu'entama Vicente Alvarez Areces, el mesmu que califica de lleendes urbanes a la emigración de la mocedá asturiano".

Dende Mocedá d'Izquierda Asturiana (mias>>) valórense pernegativamente los datos asoleyaos n'informe del observatoriu ocupacional del INEM tituláu "Mercáu de Trabayu de la mocedá. Asturies". Acordies col informe, más del 70% de los contratos son temporales y dientro'l sector servicios, lo que pa Carlos Suari supón "la falta de dinamismu na economía asturiana y los problemes estructurales que carez el nuesu feble mercáu llaboral, fechos venceyaos al apueste del PSOE y IU-BA por una economía especulativa, ensin rumbu, en cuenta d'una economía productiva que ye la que de verdá xenera valor añadíu y emplegu de calidá".

Énte estos datos, mias>> afirma que Vicente Álvarez Areces ye, como presidente d'Asturies,  el principal responsable políticu de la emigración forciada de la mocedá asturiano énte la falta d'espectatives llaborales nesti País. Amás, la mocedá d'IAS considera que la postura del presidente, que refuga la realidá que carecen los miles de moces y mozos que se ven obligaos a emigrar, ye un insultu y una posición irrespetuosa dafechu pa colos qu'emigraron y pa toles asturianes y asturianos. Nesti sen, Carlos Suari califica como un "problema pergrave que precisa per parte de Vicente Alvarez Areces y los sos socios d'IU-BA que dexen la so indolencia y aparen de despreciar y amenorgar el fechu de que miles de moces y mozos asturianos tean obligaos a colar darréu d'unes polítiques fracasaes"

Dende Mocedá d'Izquierda Asturiana quieren recordar les pallabres del portavoz d'Izquierda Asturiana (IAS) Inaciu Llope qu'afitaba "que demientres nel gobiernu gallegu se considera una "llacra" la emigración de la mocedá más cualificao, Alvarez Areces y el gobiernu asturianu anecien en calificala de "mera movilidá xeográfica de mocedá dinámico nel contestu européu".

Pa finar, mias>> desixe “un cambéu real nes polítiques d'emplegu xuvenil” y espera que “Alvarez Areces seya a averase a la realidá que viven bien de moces y mozos n'Asturies enfotaos en tornar a la so tierra dempués de tener que colar a la fuercia d'esti País pa guetar un trabayu"

Estaya de Comunicación de mias>>
Uviéu, a 23 d’agostu de2006

contauta con nós

Mocedá d'Izquierda Asturiana 2006