mias>> nel día de la Nación

09/09/2006 >> Mocedá d’Izquierda Asturiana asistió ayeri a tolos actos que se celebraron en Nava, siendo protagonista al par d’IAS y Asturianistes. La xornada entamó con una concentración a les afueres del pueblu, onde, xunto a una de les pancartes que dambos partíos políticos tienen escolingaes pa protestar contra la llinia Soto-Penagos y la mala política enerxética y antiecolóxica que tamos careciendo, reinvidicóse qu'"Asturies merez otra cosa". 

Al meudía, un restorán de la villa naveta foi l’escenariu nel que tolos asistentes participaron nuna xinta de xermandía, na que, nos postres, intervinieron Ignaciu Llope por IAS, Patricia Teja por Asturianistes, y Carlos F. Fuente, como portavoz en funciones, por mias>>. El nuesu representante aprovechó pa celebrar l’añu de camín que va facer la organización como ámbitu d’aición independiente anque siempre vinculáu y engranáu dientro de la maquinaria política d’IAS. Nel discursu celebróse amás el nuevu escenariu que pa nós y pal asturianismu –y máxime pensando nes y nos electores de 2007- plantega la unidá d’aición de los partíos políticos Asturianistes y Izquierda Asturiana. Pues ver el discursu completu de mias>> equí.

Los actos, a los qu’asistieron medios como TeleAsturias, Asturies.com, El Comercio y La Nueva España, allargáronse hasta bien entrada la nueche naveta, na qu’entá bien de militantes de les trés organizaciones siguíen espardiendo material reivindicativo, tanto personalmente como dende'l puestín de mias>>, onde la información sobre’l nuesu proyectu tuvo a disposición de toes y toos, neto que la ropa y el restu de merchandising que Mocedá d’Izquierda Asturiana vien espardiendo dientro y fuera del nuesu país.

Estaya de Comunicación de mias>>
Uviéu, 9 de setiembre de 2006

contauta con nós

Mocedá d'Izquierda Asturiana 2006