mias>> refuga la celebración de la Guardia Civil n’Asturies

L’agrupación d’izquierda nacionalista llama al pueblu asturianu a dar la espalda a estos actos

05/10/2006 >> Dende Mocedá d’Izquierda Asturiana faise un llamáu al pueblu asturianu a nun asistir nin presenciar los actos que con motivu de la celebración de la so patrona, la Guardia Civil prepara n’Asturies pa esta mesma selmana. La convocatoria a l’abstención respeuto a estes espresiones vien de la mano d’un deseyu de paz y antimilitarismu pal país asturianu. En boca del so portavoz nacional Carlos Suari “en mias>> recibimos esta anuncia sobre la celebración añal de la Guardia Civil equí n’Asturies con fonda preocupación énte lo qu’entendemos como unos actos innecesarios y propios d’otru tiempu”.

Amás, la organización de mocedá considera un petite señaldosu y de maneres antigües que namás pretende sacar a pasiar peles cais d’Uviéu elementos bélicos y formes belicoses que poco aporten a un momentu actual onde lo verdaderamente importante ye facer un apueste pola paz, el diálogu, la igualdá y la solidariedá.

Neto que peles cais d’Uviéu, en Cabu Noval (Noreña) y na capital del estáu español, esti tipu de desfiles militares van sucedese nes próximes xornaes no que puede enmarcase nun grupu d’actos rellacionaos col día la Hispanidá (antiguu día de la raza) qu’un añu más tráenos la semeya más rancia y escura: la de la imposición y les armes, como un suvenir del fascismu que durante décades fixo por afoganos.

Según Suari “nun ye nengún arguyu sacar les tropes a la cai, paez más bien la toma d’una ciudá que tenta por facer una vida normal y cotidiana que ve ensin esperalo nin pidilo cómo cientos d’uniformes y grandes cantidaes de material armamentístico mos ocupen”. El portavoz nacional de Mocedá d’Izquierda Asturiana amiesta, “¿quiciabes pa estes persones ye motivu d’enchipe andar peles nueses cais coles sos armes? ¿vienen a dicinos que la fiesta ye sacar los sos recursos a la cai? ¿qué tipu de fiesta tien que se celebrar dende, en, por y sobre les armes?”.

Continuando nesta llinia contestataria y reivindicativa, Mocedá d’Izquierda Asturiana va tar los próximos díes n’Uviéu llevando a la xente estes reflexones per aciu de material informativo diverso, mesmo que solicitando la total indiferencia de la ciudadanía uvieína y asturiana hacia estes expresiones d’esaltación del armamentismu que dende esta agrupación de moces y mozos de la izquierda alternativa y nacionalista, verde y ecoloxista, refugamos con toles nueses fuercies.

Estaya de Comunicación de mias>>
Uviéu, a 5 d’ochobre de 2006

contauta con nós

Mocedá d'Izquierda Asturiana 2006