mias>> opúnxose al desfile de la Guardia Civil n’Asturies faciendo un llamáu al antimilitarismu y a la paz.

Esta primer campaña del mes enmárcase nel plan “Ochobre: el meyor homenaxe, la llucha” de Mocedá d’Izquierda Asturiana.

09/10/2006 >> Durante vienres, sábadu y domingu, Mocedá d’Izquierda Asturiana entamó y desendolcó una campaña contra les eshibiciones militares en xeneral y contra’l desfile de la Guardia Civil n’Asturies en concreto. La campaña cuntó con dellos elementos que tuvieron como oxetivu la sensibilización de la población énte la esaltación bélica.

Durante vienres y sábadu bien de militantes repartieron per too Uviéu miles de panfletos informativos sobre la campaña, nos que se pidía a la población una indiferencia absoluta hacia esti tipu de “celebraciones”. Al mesmu tiempu, yeren les propies y los propios militantes quien informaben na cai del qué, el cuándo, el cómo y el por qué d’estos actos.

Yá’l mesmu domingu del desfile, colgáronse cuasi una ventena de pancartes d’otres tantes pontes y muries de la capital asturiana y la redolada, nes que s’espresaben mensaxes pacifistes y antimilitaristes. Delles en llugares tan señalaos como la estación d’autobuses, énte l’edificiu pasarela, n’El Caleyu, en La Corredoria, en Xeneral Elorza, en Primo de Rivera, al par de la estatua de Teijeiro, énte la Cruz Colorada, n’El Campo Los Patos, na estación de RENFE, n’Uría…  Ente los lemes: “Desfiles non”, “Menos tanques, más xusticia social” o “Asturies insumisa, militares non”.

Como yá se señalara na presentación de la campaña, la organización nacionalista de mocedá consideró esti desfile como un petite señaldosu y de maneres antigües que namás pretendió sacar a pasiar peles cais d’Uviéu elementos bélicos que poco aporten a un momentu actual onde lo verdaderamente importante ye facer un apueste pola paz, el diálogu, la igualdá y la solidariedá. Esti tipu de desfiles militares van sucedese nes próximes xornaes no que puede entendese como un grupu d’actos rellacionaos col día la Hispanidá (antiguu día de la raza) qu’un añu más tráenos la semeya más rancia y escura: la de la imposición y les armes, como un suvenir del fascismu que durante décades fixo por afoganos.

Según comentara’l portavoz nacional de Mocedá d’Izquierda Asturiana, Carlos Suari el día la presentación d’esta campaña “nun ye nengún arguyu sacar les tropes a la cai, paez más bien la toma d’una ciudá que tenta por facer una vida normal y cotidiana y que ve ensin esperalo nin pidilo cómo cientos d’uniformes y grandes cantidaes de material armamentístico mos ocupen”. “¿Quiciabes pa estes persones ye motivu d’enchipe andar peles nueses cais coles sos armes? ¿vienen a dicinos que la fiesta ye sacar los sos recursos militares a la cai? ¿qué tipu de fiesta tien que se celebrar dende, en, por y sobre les armes?”.

Esta campaña forma parte del qu’en Mocedá d’Izquierda Asturiana ta planiáu como mes de les lluches sociales, baxo’l lema “Ochobre: el meyor homenaxe, la llucha”. Un mes, esti ochobre de 2006, nel que n’alcordanza d’una revolución como la del 34, mias>> quier reivindicar aquellos valores de los que fai usu anguaño, los de la solidariedá y la revolución social, la llucha énte les imposiciones y el fascismu. Asina, durante les trés selmanes que vienen, la organización de mocedá va siguir sacando a la cai diferentes campañes coles que reivindicar un mundu y una Asturies meyores: con más xusticia social y más igualdá, onde s’apueste pola paz, onde les agresiones, les armes y les imposiciones nun seyan una constante na vida de les persones. Ye ésta, pa mias>>, la meyor manera de facer homenaxe a aquelles muyeres y homes que llucharon n’ochobre de 1934.

Estaya de Comunicación de mias>>
Uviéu, 9 d’ochobre de 2006

contauta con nós

Mocedá d'Izquierda Asturiana 2006