mias>> solidarizóse coles Lleendes Urbanes na Estación d'autobuses d'Uviéu
LA ORGANIZACIÓN DE MOCEDÁ D’IZQUIERDA ASTURIANISTA PROTESTÓ CONTRA LA INOPERANCIA DEL GOBIERNU ASTURIANU EN MATERIA DE POLÍTIQUES D’EMPLEGU Y EMANCIPACIÓN PA LA MOCEDÁ
>> La emigración moza que carez Asturies y l’actitú despótica de los principales cargos políticos asturianos, encabezaos por Vicente Álvarez Areces, cola propia mocedá que carez d’esta situación, son los dos principales frentes d’esta campaña qu’organiza Mocedá d’Izquierda Asturiana, una agrupación de moces y mozos que trabayen dende postulaos nacionalistes, ecoloxistes y d’esquierda y vinculada dafechu al partíu políticu Izquierda Asturiana (IAS)
>> Pa Mocedá d’Izquierda Asturiana (MIAS) la meyor manera de tar al llau de la mocedá qu’emigra ye, amás de tener una actitú constante de solidariedá coles persones qu’encarnen esti fechu, trabayar na información y concienciación del gran caláu d’esti problema qu’afecta en diferentes estayes de la vida de les moces y los mozos.
>> Na rueda de prensa que se celebró’l sábadu 14 d’ochobre a les 12 de la mañana nel llar central de MIAS/IAS –asitiáu n’Uviéu-, Mocedá d’Izquierda Asturiana cuntó cola presencia del economista Carlos Fernández Fuente, responsable de Polítiques de Desendolcu Socioeconómicu de la organización. Tal como esplicó Fdez. Fuente, MIAS planteó esta campaña n’apoyu a la mocedá emigrante d’Asturies, criticando’l problema xeneral de la emigración masiva de moces y mozos asturianos/es que conlleva terribles repercusiones sociales y económiques, por culpa d’una inoperancia gubernamental absoluta interpretada por una clas política que nun ye quien a dar respuesta a esti drama social de gran magnitú.
>> La campaña tuvo como actu central una despidida de les “lleendes urbanes” que se fixo na tarde de güei (domingu 15 d’ochobre) a les 19 hores na estación d’autobuses d’Uviéu. Ellí se repartió, ente otru material informativo, el Manual de la Mocedá Emigrante d’Asturies, un documentu que busca la concienciación y la sensibilización cola fondura d’esti fechu social sangrientu y propiu del nuesu tiempu. Un momentu, el de la despidida, nel que se buscó la solidariedá y el contactu directu y candial cola xente mozo que tornaba a los sos llugares d’estudiu y trabayu tres la ponte.
>> Como recordó Carlos Fernández Fuente “esta campaña enmárcase dientro del plan d’aición reivindicativa que MIAS vien desenvolviendo esti mes d’ochobre con motivu de l’alcordanza de la Revolución de 1934”. El plan llámase Ochobre: el meyor homenaxe, la llucha, y tien como oxetivu actualizar los valores de revolución social d’aquella llucha p’aplicalos anguaño n’asuntos y lluches d’interés y actualidá como l’antimilitarismu (casu de la campaña de la selmana pasada) o la reivindicación polos derechos de la mocedá y les sos oportunidaes de futuru digno na so propia tierra, motivu fundamental de la campaña que remató esta tarde na estación d’autobuses d’Uviéu.
Estaya de Comunicación de
mias>>
Uviéu, 15 d’ochobre de 2006
contauta con nós
Mocedá d'Izquierda Asturiana 2006 |
