mias>> lluchando polos valores republicanistes
12/11/2006 >>Mocedá d'Izquierda Asturiana entamó los díes 20, 21, 22 y 23 d'ochobre dellos actos republicanistes enmarcaos dientro de l'homenaxe que la mocedá d'esquierda alternativa y nacionalista fai nel aniversariu de la Revolución d'ochobre de 1934.
La movilización consistió na presentación d'un Manifiestu Republicanista, l'espardimientu de miles de copies peles cais d'Uviéu, una conferencia a cargu del miembru de la Direición Nacional d'Izquierda Asturiana y historiador Faustino Zapico nel Campus del Milán y la cuelga de pancartes reivindicatives pela redolada d'un Uviéu que fizo frente a la función de títeres que tolos años convierte a esta ciudá na capital cortesana del imperiu con motivu de los "Premios Príncipe".
Asina, les mocedaes del partíu Izquierda Asturiana, asoleyaron un manifiestu republicanista que foi espardíu a miles de persones a lo llargo de tol sábadu 21 d'ochobre peles cais céntriques d'Uviéu (mercáu'l Fontán, cai Uría, Pza la Escandalera, Pza'l Campoamor...) amosando asina la so refuga pa colos actos de despilfarru y desigualdá que, añu tres d'añu, la Fundación Premios Príncipe entama n'Asturies.
Per otru lláu, el domingu 22 fízose una cuelga de pancartes pela redolada d'Uviéu y nos accesos peles principales víes d'entrada a la ciudá con pancartes onde se lleía "Monarquía?? Non, gracies!!", y aprovechando la céntrica estatua "Cabecera de Manifestación" asitiada énte'l Teatru Campoamor.
Pa rematar, el llunes 23, nel salón d'actos de la Facultá d'Hestoria del campus del Milán, Faustino Zapico, historiador y miembru de la Direición Nacional d'Izquierda Asturiana dió una conferencia entitulada "Una propuesta republicana p'Asturies", onde fizo un repás nel republicanismu asturianu y un apueste polos valores humanistes y republicanistes como modelu de gobiernu pa cualquier país, finando l'actu con un alderique onde temes como la xusticia social, la igualdá, la renta básica y otres propuestes fueron debatíos. La conferencia foi presentada pol portavoz de mias>> Carlos Suari Rodrigue y con ello púnxose'l cierre a estes xornaes republicanistes.
Por una Asturies republicanista.
Polos valores de xusticia social y igualdá...
MONARQUÍA?? ...non, gracies!!
Estaya de Comunicación de mias>>
Uviéu, 12 de payares de 2006
contauta con nós
Mocedá d'Izquierda Asturiana 2006 |
