| |
MIAS>>
solidarízase cola mocedá francés
Mocedá d’Izquierda
Asturiana critica la reforma llaboral neolliberal
23/02/2006
Dende Mocedá d’Izquierda
Asturiana queremos espresar el nuesu apoyu y la nuesa solidariedá
cola mocedá francés, que tres de l’aprobación
en Senáu del proyectu de llei sobre "Igualdá
d’Oportunidaes", qu’inclúi’l controvertíu
Contratu de Primer Emplegu o CPE (Contrat Premières Embauches),
salió a la cai a protestar, organizóse en conceyos
abiertos nes Universidaes de toa Francia, y sigue güei
oponiéndose frontalmente a esta reforma llaboral.
El funcionamientu
d’esti nuevu modelu ye cenciellu, bien asemeyáu
al Contratu de Nuevu Emplegu o CNE (Contrat Nouvelles Embauches)
aprobáu n’Agostu de 2005. El CNE restrinxía’l
so campu d’actuación a les empreses de menos de
20 trabayadores, mentanto que’l CPE nun mira pal tamañu
de les empreses sinon que limita l’actuación según
la edá. D’esta miente dende los 16 hasta los 26
los mozos y moces diben tar suxetos a esta triba de contratu,
pol que puen despidilos ensin causa xustificada, con un preavisu
máximu de 3 meses (según el tiempu trabayao) nos
dos primeros años de contratu. Asina un mozu pue tar
hasta 10 años ensin atopar una estabilidá llaboral,
situación que viola’l derechu de los trabayadores
de forma flagrante y que los humilda y emburria a vivir nunes
condiciones precaries.
Amás de lo enantes amentao, el CPE tamién recueye
una disminución na edá mínima pa trabayar,
baxándola de 16 a 14 años pa trabayos diurnos,
y a 15 pa trabayos nocturnos. Tal llei instaura "Contratu
de Responsabilidá Parental" polo que si despiden
un mozu por "mal comportamientu" o si lu echen de
la escuela o institutu, los pas pierden tou derechu a ayudes,
o subvenciones pa morada, estudiu, alimentación, etc.
Dende
mias>> afalamos a la mocedá de Francia a que sigan
refugando esta reforma, a que sigan plantando cara al executivu
de De Villepin, que ta mostrando la cara más lliberal,
faciendo oyíos de mercader énte’l pueblu
y el verdaderu problema de Francia, que ye la situación
de desemplegu ente la mocedá y ente les clases marxinales
de los arrabaldes franceses, onde les muyeres siempre son les
más perxudicaes, el 36% de les muyeres nueves tán
en situación de desemplegu o de subemplegu, frente al
25% de los homes nuevos.
L’exemplu
francés ye ún más nel conxuntu de cambeos
que tán afectando a la configuración tradicional
de les rellaciones llaborales n’Europa y en Mundu. La
necesidá d’un nuevu modelu parez imponese mas,
como ta demostrando la experiencia francesa, esti nuevu modelu
nun pue facese de llombu a los trabayadores. El movimientu sindical
y estudiantil francés dio una vegada más un exemplu
de capacidá de respuesta y movilización. Como
mínimo llogró una primer victoria: el modelu de
rellaciones llaborales ta discutiéndose públicamente
y esto, per se, ta obligando al gobiernu francés a xustificar
reiteradamente les midíes adoptaes.
Dende
mias>> facemos un llamáu a la mocedá asturiano
y a lo de tol estáu español, a que tea atenta
énte la reforma llaboral que se ta "cociendo"
nel Estáu, tamién d’espaldes a la ciudadanía.
La mocedá tien que tomar la palabra dende yá,
faciendo saber al gobiernu que nun vamos aceptar una reforma
lliberal, que nun vamos renunciar a los nuesos derechos, y que
si ye preciso, como los mozos y moces franceses vamos salir
a la cai, trancar les universidaes, y organizanos pa espresar
la nuesa refuga, a esta globalización mal entendida,
a esti modelu lliberal que nos quieren implantar y a esta forma
d’actuar, siempre de llombu a la mocedá. Porque
la nuesta opinión tien que-yos importar.
Dende mias>> vamos siguir con gran interés lo
qu’asoceda en Francia, onde la pasada fuelga xeneral del
día 28 de marzu foi un gran éxitu y afalamos la
llucha de la mocedá galo pa ser a facer frente a esta
nueva agresión neolliberal.
En Mocedá d'Izquierda Asturiana nun pasamos reformes
agresives pa beneficiar a unos pocos, extorsionando la mocedá
y precarizando los nuesos emplegos. Defendémoslo na plataforma
Stop Bolkestein y defendémoslo xunto a la mocedá
francés:
¡YÁ VALIÓ!
N’Uviéu a 31 de mayu de 2006.
Estaya de Comunicación de Mocedá d’Izquierda
Asturiana.
contauta con nós
Mocedá d'Izquierda Asturiana 2006 |
|
|
