mias>> na manifestación pola escuela pública y contra la LOE

23/02/2006 Mocedá d'Izquierda Asturiana participó ayeri na manifestación "pola escuela pública y contra esta LOE" que tuvo llugar peles cais de Xixón. El cortexu que cuntó cola presencia de dellos cientos de persones entamó na plaza l'humedal a les 19.00hores pa finar na plaza'l parchís dempués d'un bon recorríu peles cais de la villa. El cortexu d'IAS-mias>> diba encabezáu por una pancarta onde se podía lleer RELIXÓN NES ESCUELES ¡NON! a la que siguía otra que pidía una ESCUELA ASTURIANA, PÚBLICA, LLAICA Y DE CALIDÁ. Tampoco nun faltaron les banderes amarielles d'IAS y d'Asturies y los glayíos de la mocedá: "Más asturianu, menos relixón", "Los cures y les monxes chupen como esponxes", "Zapatero tas como'l clero" o "Asturianu nes escueles, relixón nes ilesies".

Al aportar a la céntrica plaza xixonesa del parchís fízose llectura del comunicáu conxuntu de les organizaciones convocantes, finando l'actu con glayíos de "L'abstención ye traición", consigna que s'espardió dende'l nuesu cortexu al restu d'asistentes, en clara alusión a les organizaciones presentes que dieron de pasu esta llei en Madrid y, al tiempu, siguen "manifestándose" a la so escontra

Per otru lláu, los militantes d'IAS-mias>> espardieron un panfletu onde se podía lleer la nuesa postura no que cinca al conflictu educativu n'Asturies. Amás, Mocedá d'Izquierda Asturiana asoleyó un Na Cai>> especial LOE onde se trataron, tamién, otros temes como "La ópera bufa d'IU-BA col tema de la incineradora en Serín" o "les detenciones illegales a inmigrantes n'Asturies", no que ye la sesta entrega del nuesu cartafueyu d'información mensual.

Dende Mocedá d'Izquierda Asturiana nun vamos parar de pidir y lluchar por una escuela asturiana, llaica, pública y de calidá: ESCONTRA ESTA LOE, POLA ESCUELA PÚBLICA.

contauta con nós

Mocedá d'Izquierda Asturiana 2006