Contra la especulación, la corrupción y l’atentáu ecolóxicu: “Nin p’Asturies nin pa nengún sitiu”
Mocedá d’Izquierda Asturiana realizó una protesta énte la nueva oficina de Marina d’Or nel centru d’Uviéu
12/01/2007 >> La organización de mocedá vinculada al partíu políticu Izquierda Asturiana (IAS) llevó alantre una aición el vienres 12 na que denunció la especulación y corrupción urbanística xunto col atentáu ecolóxicu descomanáu que ta careciendo Asturies.
L’espoxigue económicu d’esti tipu d’iniciatives qu’entamaren a muncha distancia d’equí –en referencia clara al complexu turísticu Marina d’Or- ta faciendo qu’últimamente n’Asturies vengamos sufriendo de la mesma manera una auténtica estroza del mediu natural, promovida dende la iniciativa privada y especuladora col consentimientu cómpliz de les alministraciones públiques (estáu central, gobiernu asturianu y conceyos).
Pa Mocedá d’Izquierda Asturiana l’oxetivu d’estes polítiques ye clara: ganar perres a costa de dexanos n’herencia una Asturies enllena de campos de golf, urbanizaciones nel litoral, megapuertos, incineradores descomanaes, regasificadores y centrales térmiques y de ciclu combináu coles sos respectives llinies d’alta tensión trevesando parques naturales y zones habitaes ensin escrúpulos...
Ye por ello, que mias>>, escoyó esti símbolu de la especulación y del desaniciu ecolóxicu como sitiu onde denunciar les iniciatives urbanístiques y antiecolóxiques que tán promoviéndose n’Asturies.
Pa la organización nacionalista d’esquierdes, “esti negociu, onde la corrupción y la prevaricación xabaces tán a la orde’l día, yá ye una realidá nel nuesu país d’unos años p’acá, tando na base de la política que desendolca esti gobiernu dañible de la falsa “izquierda plural” del PSOE + IU.”
Porque tamos contra la estroza de la nuesa naturaleza pal beneficiu de cuatro, porque creemos qu’otra relación col mediu y los recursos naturales ye posible, porque nun vamos aparar de denunciar estes constantes agresiones vengan d’onde vengan y seyan onde seyan... ¡nin p’Asturies nin pa nengún sitiu!
Estaya de comunicación de mias>>
Uviéu, a 12 de xineru de 2007
