Les organizaciones de mocedá Chobenalla Aragonesista y Mocedá d’Izquierda Asturiana (MIAS) soliciten que, lo mesmo Asturies qu’Aragón, puedan disponer de dominios territoriales propios pa les sos respeutives comunidaes culturales y llingüístiques.
13/02/2007>> La consecución d’un dominiu propriu de primer nivel d’Internet (TLD) p’Asturies y Aragón ye prioritariu pa Chobenalla Aragonesista y Mocedá d’Izquierda Asturiana (mias>>) porque ye necesario pa la sobrevivencia cultural y llingüística d’entrambes comunidaes la presencia y identificación na Internet al traviés del .ast y del .ara.
Énte estes considerances, la propuesta de los dominios .ara y .ast promovida poles organizaciones de mocedá Chobenalla Aragonesista y Mocedá d’Izquierda Asturiana tien de ser respaldada polos proprios gobiernos d’Aragón y Asturies pa poder presentar a la Internet Corporation for Assigned Names and Numbers (ICANN), que ye la entidá responsable d’otorgar los dominios d’Internet, la candidatura p'algamar los dominios .ast y .ara, pa entrambes comunidaes llingüístiques y culturales.
La ICANN yá anició’l períodu de consultes y evaluación de los dominios destinaos a comunidaes específicos que-y presentaron, aprobando hasta agora’l dominiu .cat destináu pa la comunidá llingüística y cultural catalana. Amás esisten anguaño distintes iniciatives orixinaes nes comunidaes culturales y llingüístiques d’Escocia, Gales, Bretaña y Galicia solicitando los dominios .sco, .cym, .bzh y .gal respeutivamente.
P’acabar, Chobenalla Aragonesista y Mocedá d’Izquierda Asturiana encamienten a les asociaciones, empreses, instituciones, coleutivos y toles ciudadanes y ciudadanos a qu'apoyen esta iniciativa y se solicite formalmente lo que sedrá la futura imaxen y identidá d’Aragón y Asturies na Internet.
Esta vindicación súmase al proyeutu de collaboración en lluches sociales que mias>> y Chobenalla entamaron el pasáu añu y que dio llugar a la páxina web arast.net como mediu de comunicación propriu y nel qu’entrambes organizaciones van siguir apostando como voceru de les sos campañes na rede.
Estaya de Comunicación y Nueves Tecnoloxíes de mias>>
Uviéu, 13 de febreru de 2007
