mias>> denuncia la "desasturianización" del Antroxu n'Uviéu

La organización de mocedá desixe al Conceyu respetu pola cultura asturiana

23/02/2007 >> La organización de mocedá vinculada al partíu Izquierda Asturiana denunció ayeri en comunicáu de prensa remitíu a los medios la "desasturianización de la fiesta d'Antroxu na capital d'Asturies".  Nun ye la primer vegada que mias>> se posiciona énte un fechu similar, la organización denunció yá l'añu pasáu la castellanización de la fiesta del "Amagüestu" nel conceyu de Mieres.

Pa Clara Díez, Secretaria de Cultura de la organización, "el conceyu d'Uviéu propón una serie d'actos onde hai una ausencia total d'elementos propios de la tradición cultural asturiana, entamando pol nome de les fiestes, onde s'arrequexa a "l'Antroxu" pa convertilu nun "Carnaval" al más puru estilu tinerfeñu o gaditanu."

Según la portavoz de la organización nacionalista d'izquierdes "nun ye un fechu aislláu: a la nula presencia de la llingua asturiana na campaña de festexos hai qu'axuntar la programación d'actos pa esti fin de selmana qu'inclúi esperpentos como la cellebración d'una Queimada gallega o l'actuación del grupu arxentín Ráfaga, dexando de lláu la promoción de tradiciones culturales propies como los frixuelos o la música del país".

Ye por ello que dende Mocedá d’Izquierda Asturiana desíxese a los responsables de festexos del conceyu "un mínimu de respetu y apreciu pola bayura cultural propia d'Asturies pa evitar la so desapaición", afitando que "desprecios como'l qu'alcontramos na planificación política del Antroxu n'Uviéu provoquen que cada vegada seya más difícil preservar y dignificar la cultura asturiana".

Pa terminar, Clara Díez reprochó al alcalde Gabino de Lorenzo "l'enfotu qu'amuesa pa promocionar la Zarzuela madrileña en contraposición cola nula esmolición por defender les tradiciones milenaries de les asturianes y asturianos" esperando que'l propiu alcalde y los sos conceyales "tomen nota y faigan daqué no que cinca a esti fechu n'años vinientes".

Estaya de Cultura y Enseñu de mias>>
Uviéu, a 23 de febreru de 2007

contauta con nós

Mocedá d'Izquierda Asturiana 2007