18/02/2007>>Mocedá d'Izquierda Asturiana participó'l pasáu 17 de febreru na manifestación convocada pola Xunta pola Defensa de la Llingua y los sindicatos SUATEA, CCOO Enseñanza y FETE-UXT por una presencia digna y en condiciones de normalidá de la llingua asturiana nes escueles del país. Unes 2000 persones axuntáronse peles cais d'Uviéu, aguantando'l bastiáu d'agua que cayó nel trescursu de la marcha, pa reivindicar el derechu de los neños asturianos a deprender la so llingua.
Esta movilización desendolcóse pocos díes dempués de la espublización del borrador del nuevu currículu pa la educación primaria per parte de la Conseyería d'Educación, nel que l'asturianu empeora tovía más la so situación na enseñanza primaria, pasando a ser namás qu'una asignatura "optativa" en competencia con otres materies, aumentando asina la marxinalidá que yá carez la nuesa llingua pesie a la bona acoyida que tien anguaño ente los escolinos asturianos, yá que 15.000 d'ellos cursen voluntariamente l'asignatura.
Dende mias>> creemos que la única solución real a esti conflictu, como tantos otros, ye la oficialidá de la llingua asturiana. En cualquier casu, apuntamos como culpable indiscutible de la situación al gobiernu de PSOE y IU-BpA, que vien desendolcando unes polítiques evidentemente nefastes pa cola llingua y la cultura asturiana. Poro, nun dubiamos en tresformar una vieya consigna del movimientu de vindicación llingüística y glayalo bien alto:
Con esti gobiernu... ¡"Bable" nes esqueles!
Estaya de Comunicación de mias>>
Uviéu, a 18 de febreru de 2007
