Éxitu del conciertu entamáu por mias>> en Mieres
Arma X, 13 Palabras, Huborge y Hugo Electro actuaron nel primer actu electoral de la campaña d'IAS-Asturianistes por Mieres énte un Mausoléu tremáu de xente
13/05/2007 >> La mocedá mierense respondió a la convocatoria de mias>> esti vienres 11 de mayu, enllenando'l pub Mausoléu y amosando'l so sofitu a la candidatura d'IAS-Asturianistes nel primer actu de la campaña electoral nel conceyu de Mieres.
L'actu abrióse sobre les 7 y media de la tardi cola intervención política del candidatu d'IAS a l'alcaldía, Faustino Zapico. Nun discursu breve y concisu, Zapico centróse especialmente na crisis económica del conceyu, ún de los puntos más afectaos pola situación llamentable que carez Asturies entera, y qu'obliga a munchos mozos y moces mierenses a colar tolos años a les ciudaes más grandes del país o direutamente fuera de les nueses llendes. Amás, Zapico tamién denunció la falta d'opciones d'ociu pa la mocedá mierense, pa completar una intervención siguida con atención y aplaudida polos asistentes.
Tres les palabres del candidatu, Ernesto Suárez, integrante de la Dirección Nacional d'IAS y coordinador de la candidatura de Mieres, dio pasu a les actuaciones musicales. El raperu Arma X, conocíu pola so trayectoria col grupu Stoned Atmosphere, presentó dellos temes del que va ser el so primer trabayu en solitariu, "Veinticinco otoños". El públicu siguió con entusiasmu l'actuación, coreando les lletres de munchos de los cantares.
Dempués d'Arma X, subió a la tarima'l grupu hip hop del conceyu 13 Palabras, dende Uxo, que demostraron mui bones maneres. La intensa actuación de 13P dio pasu a un "micro abiertu" nel que dellos mozos y moces del conceyu llanzáronse a amosar les sos habilidaes musicales, pa rematar la parte hip hop de la nueche.
Peslló esti actu-conciertu, con un xiru d'estilu, la música lletrónico d'Huborge y Hugo Electro, qu'amosaron nel Mausoléu dellos ritmos bien prestosos. Pasaes les once de la nueche dábemos por terminada la folixa, agradecíos pola bona rempuesta de la mocedá mierense y naguando por repetir la esperiencia prósimamente.
contauta con nós
Mocedá d'Izquierda Asturiana 2007 |
