mias>> critica un nuevu ataque de Gabino de Lorenzo a les opciones d'ociu y cultura de la mocedá d'Uviéu

La organización denuncia la llamentable política municipal d'ociu mozo y refuga les formes emplegaes pol alcalde uvieín

19/06/2007 >> Mocedá d’Izquierda Asturiana, organización arreyada al partíu Izquierda Asturiana (IAS), amosó esti llunes el so descontentu cola llinia d’actuación anunciada pol alcalde d’Uviéu Gabino de Lorenzo, dempués d’unes declaraciones nes qu’aseguraba que diba entamar una “cruzada contra’l ruíu” na capital asturiana, cancelando asina toles fiestes y conciertos de nueche na ciudá, sacante les de Samateo.

Dende mias>> califícase de “escandalosa” esta midida, que va significar otru golpe a la ufierta cultural y d’ociu n’Uviéu, “un conceyu que yá carez d’una programación de conciertos a l’altura necesaria, obligando a los mozos y moces a buscar esti tipu d’actividaes n’otres ciudaes cercanes como Xixón que disponen d’una cantidá d’alternatives y de locales que multipliquen les de la capital”.

Los representantes de la organización de mocedá recordaben tamién que “nos últimos años esti gobiernu municipal yá vino dedicándose a desaniciar toles posibilidaes musicales que pudo, mientres financia otres actividaes con munchu menos interés pa la xente d’Uviéu, como les corríes de toros”.

Amás, en mias>> consideren que les formes emplegaes por de Lorenzo son “despótiques y insultantes”, “aneciando en reducir les espresiones culturales a simple ruíu p’afitar la so postura”; anque tamién s’entruguen “si esti enfoque de llucha pola tranquilidá nun escuende motivos de mayor pesu pa cancelar les fiestes, atendiendo a les carencies económiques que sufren les arques municipales”.

Finalmente, la organización xuvenil quixo mentar especialmente’l Festival de Jazz que s’entamaba tolos branos na ciudá y que ye una de les cellebraciones afectaes pola decisión del alcalde, destacando qu’esti se desendolcaba nunos horarios y condiciones que “de nenguna manera lu podíen facer agresivu pa los vecinos”, recordando que “nunca nun se rexistró nenguna quexa d’esti tipu”.

Estaya de Cultura y Enseñu de mias>>
Uviéu, a 19 de xunu de 2007

contauta con nós

Mocedá d'Izquierda Asturiana 2007