mias>> desixe que s'apueste poles selecciones asturianes deportives d'una vegada por toes
La rempuesta surde énte'l circu mediáticu y adoctrinamientu identitariu que supón la cellebración del partíu qu'enfrenta a la “selección española” con Lletonia n'Uviéu el próximu día 12 de setiembre
12/09/2007 >> Mocedá d'Izquierda Asturiana (mias>>), estaya de mocedá del partíu Izquierda Asturiana (IAS), volvió ayeri a desixir públicamente, en comunicáu oficial de prensa, “la vuelta a la normalidá de les seleiciones deportives asturianes, tres d'un quinqueniu d'inactividá nel tarrén futbolísticu, por exemplu, lo mesmo que na mayoría de modalidaes deportives.”
A xuiciu de la Xunta Permanente de mias>>, esti fechu “afita l'interés d'esti gobiernu -con Tini Areces al frente- de desaniciar cualquier tipu de rasgu identitariu que nos vincule como asturianos y asturianes hasta nesti tarrén deportivu, como yá fai efectivamente nel tarrén llingüísticu o cultural.”
Asina, del mesmu mou, la Xunta Permanente de mias>> denuncia que “les autoridaes faen del citáu partíu de la seleición española un actu d'autoafirmación española con un despliegue de merchandising, banderes y eslóganes ultranacionalistes -incluso suelen aprovechar pa promocionar l'allistamientu de la mocedá nel exércitu, como yá se fai n’otres competiciones como la Vuelta Ciclista-, cola complicidá y presencia de les máximes autoridaes llocales.”
Por too ello, dende Mocedá d'Izquierda Asturiana dexísese al executivu asturianu “que caltenga'l mesmu sofitu institucional y políticu col deporte asturianu que pa cola “selección española”, que carez añu tres añu la marxinación d'un presidente y un gobiernu que s'avergoña de ser asturianu.”
Amás, ínstase al gobiernu encabezáu por Álvarez Areces a que, urxentemente, “tramite la oficialidá de les seleiciones deportives asturianes d'una vegada por toes, permitiendo la so competición n’eventos deportivos de tou calter, acabando col ostracismu nel que tienen al deporte d’esti País dende bien d'años.“
Xunta Permanente de mias>>
Uviéu, a 12 de setiembre de 2007
contauta con nós
Mocedá d'Izquierda Asturiana 2007 |
