mias>> denuncia la política de fiestes uvieínes de Gabino de Lorenzo
Mocedá d’Izquierda Asturiana (mias>>), organización xuvenil d’izquierda nacionalista, anunció un actu de protesta na llectura del pregón de les fiestes sanmateínes d’Uviéu na plaza l’Ayuntamientu, el vienres día 14, contra la política de festexos que lleva alantre’l gobiernu llocal de Gabino de Lorenzo.
L’actu consistirá nuna protesta respetuosa col entamu de les fiestes a les 20:00 hores na plaza l’Ayuntamientu, cola presencia d’un lema reivindicativu y l’espardimientu a lo llargo de tola zona de chiringuitos de miles de panfletos onde se denuncien les carencies d’estos festexos.
13/09/2007 >> A xuiciu de la Xunta Permanente de mias>>, “la SOF y Gabino de Lorenzo decidieron un añu más facer de les fiestes dalgo desnaturalizao y ensin consonancia col sentir de la nuestra xente. 32 años depués de la muerte de Franco el San Mateo que l’Ayuntamientu ufre a uvieínes y uvieínos paez aporfiar n’estender un modelu impostáu de “cultura española” nel que se mecen manifestaciones festives tracamundiaes en forma y sentíu pa presentánosles como un paquete daveres cutre y tresnocháu.”
Según el comunicáu de prensa remitíu por Mocedá d’Izquierda Asturiana (mias>>) “rechazamos unes fiestes que nun son espeyu de naide nesta ciudá, sinón un artificiu de laca y lenteyuela. Con esto queremos dexar claro que tamos pola interculturalidá pero siempre dende’l respetu a les cultures orixinales y non nel manexu d’éstes al serviciu d’una identidá que nun esiste pero que s’impón.”
“Más alló de mises rocieres n’ilesies nes que de normal tán prohibiéndose elementos propios como la gaita, queremos mostrar el nuestru disgustu cola yá zuna persecutoria del alcalde en promocionar -col regalu d’entraes- la xabaz y enxamás pior llamada “fiesta” de los toros, del asesinatu d’animales. Igual que mos disgusta qu’una persona, envuelta en trames de corrupción mui escures, como Isabel Pantoja venga a la capital d’Asturies cobrando cantidaes de dineru importantes.”
Otramanera, Mocedá d’Izquierda Asturiana tamién carga contra la política de conciertos en fiestes “que ta agora definitivamente esnortiada, con precios que son los mesmos que les actuaciones en xira d’esos artistes. Mesmo que’l secuestru a manes privaes del concursu de rock de la ciudá, o que les dificultaes permanentes que se-yos tán poniendo, yá durante tol añu, a los músicos qu’entamen n’Uviéu.”
Pa rematar, la Xunta Permanente de mias>> afitó qu’estes fiestes “imponen modelos caducaos, que faen de menos Asturies, que nun apoyen a los artistes de casa, que se basen n’actuaciones pa les que nun algamen tolos bolsos, nes que se fai por afitar el toréu, brutalidá que ye pa nós del too ayena... en fin, Gabino... ¿qué fiestes son estes?”
Xunta Permanente de mias>>
Uviéu, a 13 de setiembre de 2007
contauta con nós
Mocedá d'Izquierda Asturiana 2007 |
