Los militantes de Mocedá d'Izquierda Asturiana tuvieron ente les cerca de 20.000 persones que se manifestaron peles cais d'Uviéu pa desixir la oficialidá de la llingua asturiana y el gallego-asturiano na reforma del Estatutu d'Autonomía
27/11/2007 >>Mocedá d'Izquierda Asturiana sofitó, como vien faciendo en toles convocatories del CAO -del que mias>> forma parte-, l'actu multitudinariu nel que miles de persones volvieron a glayar bien alto pa desixir esti derechu fundamental énte'l despotismu d'un gobiernu que sigue ensin mover un deu por satisfacer la voluntá de los asturianos nin por protexer ún de los elementos más importantes de la nuesa cultura y identidá.
Según datos de la organización, unes 20.000 persones siguieron el percorríu de la manifestación ente la Estación del Norte y la Plaza Porlier d'Uviéu. Primero, cerca de quinientes llegaron a la capital a pie nes marches qu'entamó'l CAO dende otres 6 poblaciones del país.
mias>> recordó cola so pancarta les trés décades que llevamos yá glayando mentres que los nuesos gobernantes, ún tres d'otru, tapen les oreyes énte ún de los problemes más sangrinos d'Asturies, qu'intenten evitar con polítiques que yá s'amosaron claramente insuficientes y xustifiquen la so inoperancia con cuentos sobre una supuesta imposición, cuando precisamente ye otra la llingua que se-y impón dende l'Estatutu d'Autonomía actual y dende l'Alministración a tola población en cualquier ámbetu.
Amás, la organización de mocedá amosó delles pancartines denunciando dalgunos de los casos nos que l'asturianu se ve marxináu más claramente: na televisión autonómica, na escuela...; y per otra parte, nel material taba bien presente l'usu y la reivindicación d'oficialidá del gallego-asturiano, que taba incluida tamién nesta convocatoria. El panfletu qu'espardió mias>> ente los asistentes a la manifestación emplegaba tamién entrambes llingües.
Como quiximos espeyar, yá son 30 años pidiendo a los partíos que nos gobernaron y gobiernen que tomen una midida mui fácil que ye imprescindible dafechu pa la sobrevivencia de los idiomes propios d'esta tierra y de miles de los sos habitantes y pa garantizar una igualdá de derechos verdadera ente la ciudadanía d'esti país. Nun vamos cansar de siguir pidiéndolo, pero'l tiempu va pasando y sabemos bien que dientro poco pue ser demasiao tarde. Los grupos políticos parlamentarios van ser los primeros responsables si les llingües d'Asturies acaben morriendo. Yá pasaron demasiaes oportunidaes, d'esti Estatutu nun pue pasar...
¡¡Oficialidá pa les nueses llingües, yá!!
Mocedá d'Izquierda Asturiana
Uviéu, a 27 de payares de 2007
